![بۆچی وا بە خۆمان دەکەین؟](/_next/image?url=https%3A%2F%2Fassets.ava.news%2Fnews%2F8679%2FRd4iRPj6K3AWYsFBOFlR.jpg&w=3840&q=100)
گرافیک: ئاڤا نیوز
بیست ساڵە ئەندامی هیچ حیزبێک نیم و پرس و کێشەی حیزبایەتی خەمی من نییە. بیست ساڵە هەموو کات و توانای سادەی خۆم بۆ خزمەتی زانست و گەشەی میدیا و ئەدەب و ڕۆشنبیریی کوردی تەرخان کردووە. سەدان ئەکادیمی، میدیاکار، ڕۆشنبیر و هونەرمەندی ئەم وڵاتەش، کە خەمی هەرە گەورەیان سەربەرزیی گەل و ئازادیی نیشتمان و یەکخستنی ڕیزەکانی کوردایەتی و نیشتمانسازییە، لەگەڵ بەندە دەپرسن:
ئاخۆ سەدان ساڵ ژێردەستەیی و پێ پەستی و زەلیلی و ئەشکەنجە و زوڵم و زۆری داگیرکەر بەس نییە؟! ئایا ئێستا کاتی بیناکردنە یان کاتی ئەوەیە بەدەستی خۆمان ئەم ماڵە سادە و ناتەواوەی خۆمان وێران بکەین!؟
ئاخۆ سەدان ساڵ دووبەرەکی و دابەشبوون و لێکدابڕان و دژایەتیی یەکدی بەس نییە؟! ئایا ئێستا کاتی ئەوەیە ڕوو لە ئاسۆیەکی گەش بکەین و دەرس و پەند لە ڕابردوومان وەربگرین، یان کاتی ئەوەیە کۆنە برین ب ەژان بێنینەوە و خەڵک و خاک و ئاووهەوامان بەگژ یەکدیدا بکەین و خەڵکی خۆمان نائومێد و دڵی نەیارانمان بەخۆمان خۆش بکەین!؟
سەدان ساڵە هاووڵاتیی داماوی ئەم کوردستانە بە کولەمەرگی ژیان دەکات و بەدەگمەن ڕوویداوە بە دڵێکی خۆش و بەئومێدەوە پێشوازیی لە ساڵی ئاییندەی کردبێت. ئاخۆ ئیتر ئەو نەهامەتییانە بەس نین؟! ئایا ئێستا کاتی ئەوەیە بە فیتی بێگانە و بۆ خزمەتی داگیرکەران پیلان داڕێژین بۆ زیادکردنی نەهامەتی و بێ بازاڕی و نابووتکردن و نائومێدکردنی خەڵکی کاسبکار و هەژار و ڕەنجدەر؟!
نزیک بە سەد ساڵە بە بیری کوردایەتی و چەپ و مارکسیزم و دادپەروەریی کۆمەڵایەتی، ڕێبەرایەتیی گشت جوڵانەوە و ڕاپەڕین و شۆڕشەکانی ئەم میللەتە کراوە. بە دەیان هەزار منداڵ و گەنج و پیر و ژن و پیاوی ئەم گەلە لە کۆڕی تێکۆشاندا گیان و جەستە و ژیانی خۆیان بەختکرد بۆ فەراهەمکردنی کەرامەت و پارووە نانێک و ژیان لە سایە و سێبەری دڵنیایی بێ ترسدا بۆ نەوەی ئەمڕۆ و نەوەکانی داهاتوومان. پرسیار ئەوەیە ئاخۆ ئاکام و ئەنجامی ئەو هەموو قوربانیدان و خەبات و تێکۆشان و فەلسەفە و ئیمانی دادپەروەرییە ئەمەیە کە ڕوودەدات؟ تازە بە تازە ماڵ و حاڵ و شار و بازاڕ و سەرچاوەی بژێویی یەکدی گڕ تێبەردەین!؟ خەریکی پیلانگێڕی بین لە دژی یەکدی؟ ئاشتەوایی کۆمەڵایەتی تێکبدەین؟ سەقامگیریی بازاڕ و بژێوی خەڵک وێران بکەین؟ یەکدی سووک بکەین و پاساوی ناڕەوا بدەینە داگیرکەر؟
ئایا زۆر سەختە بەدوور لە دەستوەردانی بێگانەو نەیاری بەرژەوەندیخواز، ئێمەی کوردی هاوزمان و هاودین و هاوخەم و هاونیشتمان پێکەوە دابنیشین و کێشە و گلەیی و ناڕەزایی و پێشنیاز و بۆچوونەکانمان بخەینە سەر مێزی گفتوگۆیەکی مەدەنیانە و ژیرانە!؟
ئایا بەم هەمووە خەڵکە تێکۆشەر و زانا و بیرمەندە دڵسۆزەوە کە هەر هەموویان خەمی گەل و نیشتمانیان لە کۆڵ کردووە، ناتوانرێ خاڵە هاوبەشەکانی نێوانمان بەسەر ناکۆکییەکانماندا زاڵ بکرێ؟ من پێموانییە ئەوە کارێکی زۆر سەخت بێ چ جای مەحاڵ بێ.
بەهەرحاڵ، هەرچی سەر دێنم و سەر دەبەم، تێناگەم ئێمە بۆچی و لەپێناوی چی وا بەخۆمان دەکەین!؟
نوێترین بیروڕا
گرنگیی فیلمی کفن لە پیشەسازیی سینەمای کوردیدا
8 کاتژمێر لەمەوپێش
بەهۆی هاوبەشیی هەواڵگرییەوە ئەمریکا و بەریتانیا لەپێشەوەن
10 کاتژمێر لەمەوپێش
دۆكترینی سهربازیی ئیسرائیل و جهنگ له ڕۆژههڵاتی ناوهڕاست
6 ئەیلوول
دۆستەکانی مام جەلال لە سلێمانی جێگایان نابێتەوە
6 ئەیلوول
گوێتان لە سەرۆکوەزیران بوو، چۆن تێیگەیشتن؟
5 ئەیلوول
سەرئێشەی بڵاوبوونەوەی ئەتۆمی بۆ سەرۆکی داهاتووی ئەمریکا
1 ئەیلوول
نوور زوهێر و پاسکوا؛ دوو دزی سەدە و یەک پەیام
30 ئاب
بۆچی مەسرور بارزانی بەئامانج دەگرن؟
27 ئاب
کفن بۆ هۆشیارکردنەوەی کۆمەڵگە لە دیاردەیەکی قێزەون
24 ئاب
کفن وەک دیمەنی کۆتایی جەنگ وابوو
22 ئاب
- بزنس
- 5 کاتژمێر لەمەوپێش
وەزارەتی دارایی عێراق نیازپاکی بۆ چارەسەرکردنی کێشەی مووچە ڕادەگەیێنێت
- ژینگە
- 5 کاتژمێر لەمەوپێش
لە کرماشان سەدان هێکتار زەوی بەهۆی ماددەی هۆشبەرەوە دەسووتێت
- بزنس
- 6 کاتژمێر لەمەوپێش
هەولێر و بەغدا مووچە و بودجە و پرسە هەڵپەسێردراوەکان تاوتوێ دەکەن
- کوردستان
- 6 کاتژمێر لەمەوپێش
ئێران جارێکی دیکە ئاوی زێی بچووک دەگرێتەوە
- بزنس
- 6 کاتژمێر لەمەوپێش
بڕیاری هاوردەکردنی بەنزینی بازرگانی دەچێتە بواری جێبەجێکردن