ئەگەر ترەمپ ببێتەوە سەرۆک چ کاریگەرییەکی لەسەر عێراق دەبێت؟

ئاڤا نیوز

ئەنجامی هەڵبژاردنی ئەمریکا  کاریگەرییەکی زۆری لەسەر عێراق دەبێت و بە بۆچوونی دوو شرۆڤەکاری سیاسی، ئەگەر ترەمپ ببێتەوە سەرۆک بەراورد بە ڕابردوو زۆر تووندتر دەبێت.

چیرۆکی  سەرەکی: سەلیم سوزە، شرۆڤەکاری سیاسی لە گفتوگۆیەکدا لەگەڵ ئاڤا نیوز پێیوایە، ئەگەر دۆناڵد ترەمپ جارێکی دیکە وەکو سەرۆکی ئەمریکا هەڵبژێردرێت، بەرامبەر بە ئێران و میلیشیاکانی لە عێراق و ناوچەکە زۆر تووندتر دەبێت بەراورد بە ساڵی 2016.

 

زانیاریی زیاتر: ترەمپ پێویستی بەوەیە بۆ دەنگدەرەکانی نیشان بدات چەند جیاوازە لە جۆ بایدن لەبارەی دۆسیەی ئەتۆمی ئێران و ڕۆژهەڵاتی نێوەڕاست.

هۆکارە زانراوەکان: بە گوتەی سوزە، ترەمپ ئەمجارە زیاتر لە پاساوێکی هەیە هێرش بکاتە سەر بەرژەوەندییەکانی ئێران، ئەمەش بەهۆی شەڕی غەززە و ڕۆڵی تاران لەو شەڕەدا، چونکە کاتێک فەرمانی کوشتنی قاسم سلێمانی دەرکرد، پاساوێکی بەهێزیشی بەدەستەوە نەبوو.

 

کاریگەری و لێکەوتەکان: بەبڕوای ئەو شرۆڤەکارە سیاسییە، لە کاتی هەڵکشانی گرژییەکان لەگەڵ ئێران، کاریگەری لەسەر دۆخی عێراق دەبێت و کاریگەری نەرێنیشی دەبێت لەسەر پەیوەندییەکانی نێوان بەغدا و واشنتن.

ئەوەی پێویستە بیزانیت: حکومەتی ئێستای عێراق دەیەوێت هاوسەنگی بپارێزێت لە پەیوەندییەکانی لەگەڵ هەردوو وڵات، بەڵام سەلیم سوزە پێیوایە ئەم هاوسەنگییە لەرزۆکە پەیوەستە بەوەی تا چەند گرژییەکان لە نێوان ترەمپ و ئێرانی سەردەمی مەسعود پزیشکیان هەڵدەکشێن؟ ئەوکات لەسەر بەغداد پێویستە یەکێک لە بەرەکان هەڵبژێرێت، هەڵبژاردنی هەر بەرەیەکیش باجی قورسی دەبێت لەسەر سیاسەت و ئابووری و سەقامگیری لەرزۆکی عێراق.

لەلایەکی دیکەوە: عەلی بەیدەر شرۆڤەکاری سیاسی بۆ ئاڤا نیوز دەڵێت، لەگەڵ گەڕانەوەی ترەمپ گرژییەکان هەڵدەکشێن،  ڕەنگە بەرپرسانی دیاری گرووپە چەکدارەکان و بنکە سەربازییەکانیان بکاتە ئامانج.