مەزڵووم عەبدی: ئامادەین گفتوگۆ لەگەڵ توركیا بکەین

ئاڤا نیوز

فەرماندەی هەسەدە ڕایدەگەیێنێ، بۆ چارەسەرکدنی کێشەی سووریا ئامادەن گفتوگۆ لەگەڵ هەموو لایەک بکەن لەنێویاندا توركیاش. جەختیش دەکاتەوە لەگەڵ یەکپارچەیی خاکی سووریان و لەمبارەیەوە چی پێویست بێت دەیکەن.

وێنە گەورەکە: دوای 13 ساڵ لە تێکچوونی پەیوەندییەکانیان، ماوەیەکە تورکیا هەوڵدەدات پەیوەندییەکانی لەگەڵ سووریا ئاسایی بکاتەوە و کار بۆ کۆبوونەوەی لووتکە لە نێوان ڕەجەب تەیب ئەردۆغان و بەشار ئەسەد دەکرێت، .

لێدوانی فەرمی: مەزڵووم عەبدی، فەرماندەی گشتیی هێزەكانی سووریای دیموكرات (هەسەدە) لە پەیامێکی ڤیدیۆییدا ڕایگەیاند، لە ڕابردوودا هێرشیان نەکردووەتە سەر هیچ هێزێک و تەنیا بەرگرییان لە خۆیان کردووە، ئێستاش ئەو کارە ناکەن ئەگەر هێرشیان نەکرێتە سەر.

زانیاریی زیاتر: بە ئاماژەکردن بەوەی كێشەی سووریا بە شەڕ ناگاتە ئەنجام و دەبێت بە دیالۆگ لە نێوان سوورییەكان چارەسەر بکرێت، مەزڵووم عەبدی دەڵێت "ئێمە ئامادەین بۆ گفتوگۆکردن لەگەڵ هەموو لایەنەكان لەنێویاندا تورکیاش، ئەمەش بۆ ئەوەی بگەینە چارەسەرێك و كۆتایی بە كێشەكان بهێنین، بەڵام ئێمە خاوەنی كۆمەڵێك پرەنسیپ و مافی تایبەتین دەبێت لەبەرچاوبگیرێن".

لەلایەکی دیکەوە: لەبارەی یەکپارچەیی خاکی سووریا فەرماندەی هەسەدە دەڵێت: " بۆ ئەوەی سووریا دابەش نەکرێت چیمان لەدەست هاتووە کردوومانە، لەمڕۆش بەدواوە هەر چی پێویست بێت بۆ یەکپارچەیی خاکی سووریا دەیکەین".