ئەمریکا و عێراق لەبارەی کشانەوەی هێزەکانی هاوپەیمانان دەست بە گفتوگۆ دەکەنەوە

ئاڤا دیجیتاڵ

لیژنەی باڵای سەربازیی هاوبەشی نێوان عێراق و ئەمریکا هەفتەی داهاتوو کۆدەبێتەوە، بۆ گفتوگۆکردن لەبارەی خشتەی کشانەوەی هێزەکانی ئەمریکا و هاوپەیمانان لە عێراق.

وێنە گەورەکە: واشنتن و بەغدا لەسەر داڕشتنی خشتەیەك بۆ چوونەدەرەوەی هێزەكانی هاوپەیمانان ڕێككەوتوون و هەرێمی کوردستانیش پشتیوانی دەکات، ئەمەش دەبێتە دووەم کۆبوونەوەی نێوانیان.

راگەیێنراوی فەرمی: یەحیا رەسووڵ، گوتەبێژی فەرماندەی گشتیی هێزە چەکدارەکانی عێراق دەڵێت: "یەکشەممەی داهاتوو 11-2-2024، لێژنەی باڵای تەکنیکی سەربازیی نێوان عێراق و ئەمەریکا کۆدەبێتەوە و دەست بە کارەکانیان دەکەنەوە".

بۆچوونی لایەنی بەرامبەر: جۆن كێربی، گوتەبێژی ئەنجومەنی ئاسایشی نیشتیمانی ئەمریكا ئەمشەو لە كۆنگرەیەكی ڕۆژنامەوانیدا ڕایگەیاند: "ئەمریكا پەیوەندییەكی باشی لەگەڵ عێراق هەیە و پشتگیری لە سەروەری عێراق دەكات. لەگەڵ عێراق گفتوگۆ دەكەین سەبارەت بە دۆخی سەربازی ئەمریكا لەو وڵاتەدا".

ئەوەی لەبارەیەوە دەگوترێت: دوای كۆكردنەوەی زیاتر لە 100 واژۆ بۆ دەركردنی هێزە بیانییەكان لە عێراق، شەممەى داهاتوو کە دەکاتە 10ی مانگ، ئەنجوومەنی نوێنەرانی عێراق كۆدەبێتەوە و گفتوگۆ دەکات لەبارەی "ئەو دەستدرێژیانەی دەكرێنە سەر سەروەری عێراق".

باکگراوند: بەسەرپەرشتی محەممەد شیاع سوودانی، سەرۆکوەزیرانی عێراق، ڕۆژی 27-1-2024ی گەڕی یەکەمی گفتوگۆی نێوان واشنتن و بەغدا بۆ کۆتاییهێنانی ئەرکی هاوپەیمانی نێودەوڵەتی لە عێراق کرا.