حەماس بە پەرۆشە بۆ گەیشتن بە ئاگربەست لەگەڵ ئیسرائیل

ئاڤا دیجیتاڵ

بەرپرسێكی فەڵەستینیی ئاشكرای كردووە وێڕای ڕەتكردنەوەی پێشنیازی یەكەمی ئاگربەست، بەڵام هێشتا حەماس دەیەوێت گفتوگۆكان لەسەر ئاگربەست لەگەڵ ئیسرائیلدا بەردەوام بێت.

چیرۆكی سەرەكی: دوای ڕەتكردنەوەی پێشنیازی پێشووی ئاگربەستی نێوان حەماس و ئیسرائیل، حەماس پێشنیازی نوێی بۆ ئیسرائیل كردووە. بەرپرسێكی فەڵەستینیش گوتوویەتی شاندێكی حەماس لەمڕۆوە لەگەڵ كاربەدەستانی میسردا كۆدەبێتەوە و دواتر لەگەڵ نوێنەرانی قەتەڕدا كار دەكەن بۆ دۆزینەوەی زەمینەی هاوبەشی لێكتێگەیشتن.

زانیارییە بەدەستهاتووەکان: بەرپرسێكی فەڵەستینیی نزیك لە حەماس، كە دانیشتووی غەزەیە و نەیویستووە ناوی ئاشكرا ببێت، بە ئاژانسی فڕانس پرێسی گوتووە "شاندێكی حەماس لەمڕۆوە لەگەڵ كاربەدەستانی میسردا كۆ دەبنەوە و دواتریش لەگەڵ نوێنەرانی قەتەڕدا كار دەكەن بۆ دۆزینەوەی زەمینەیەكی هاوبەشی لێكتێگەیشتن. زیاتر گوتوویەتی:

- پێشبینی دەكەین دانوستانەكان زۆر ئاڵۆز و قورس نەبن. هێشتا حەماس دەرگای بۆ گفتوگۆ ئاوەڵایە و بەپەرۆشە بۆ گەیشتن بە ئاگربەست.

- ئیسرائیل و حەماس چەندین گەڕی دانوستانی ناڕاستەوخۆ ئەنجام دەدەن، بەو هیوایەی بە ئاگربەستێكی شەش هەفتەیی بگەن".

• 
  - وەڵامەكەی حەماس گەیشتووەتە میسر و كاربەدەستانی قەتەڕ و ئەمریكاش بینیویانە، هەلی ئەوە بە ئیسرائیل دەدات ژمارەیەك منداڵ و ژن و پیر و نەخۆشی بارمتەی ئیسرائیلیی لای حەماس ئازاد بكات.
•  
• - لە بەرامبەردا ئیسرائیل ژمارەیەك گیراوی فەڵەستینی ئازاد دەكات، كە لەمڕۆوە گفتوگۆ لەم بارەیەوە دەكرێت.
• 
  - لە یەكەم قۆناغی ئاگربەستەكەدا ڕۆژانە ڕێگە بە نزیكەی 400 بۆ 500 ئۆتۆمبێلی بارهەڵگر دەدرێت بێنە نێو غەزەوە، كە خواردن و دەرمان و سووتەمەنییان پێیە.
•  
• -شەڕ  ڕادەگیرێت و هەردوو لا هەوڵی ڕێككەوتنێك دەدەن بۆ كشانەوەی سوپای ئیسرائیل لە غەزە و گەڕانەوەی ئاوارەكان".

- حەماس پێداگریی لەسەر ئەوە دەكات كە توركیا ، ڕووسیا ، میسڕ ، قەتەڕ ، ئەمریكا و فەرەنسا شانبەشانی یەكتر بووەستن بۆ ئەوەی ڕێككەوتنێك لە نێوان ئیسرائیل و حەماسدا بە دیبهێنن، لەوانە: ئاگربەستی هەمیشەیی و بونیادنانەوەی كەرتی غەزە.

 لە لایەكی دیكەوە: دوێنێ بنیامین ناتانیاهۆ، سەرۆكوەزیرانی ئیسرائیل، پێشنیاری ئاگربەستەكەی پێشووی حەماسی ڕەتكردەوە و بە "نائاسایی"  ناویبرد، هەڕەشەی ئەوەیكرد تا "سەركەوتنی تەواو" هەر لە هێرشە سەربازییەكانیان بەردەوام دەبن.

هەر ئەم هەفتەیەش ئەنتۆنی بلینكن، وەزیری دەرەوەی ئەمریكا، بۆ گەیشتن بە ڕێككەوتنێك لە نێوان ئیسرائیل و فەڵەستیندا لەگەڵ سەركردەكانی سعودیە و میسر و ئیسرائیل و فەڵەستین كۆبووەوە.  بلینكن داوای لە ئیسرائیل كرد كەمێك تووندیی تۆنی لێدوانەكانیان دابگرن.

باكگراوند: بزووتنەوەی حەماس لە حەوتی تشرینی یەكەمی ساڵی ڕابردوودا هێرشێكی دەستپێشخەریی لەناكاوی كردە سەر ئیسرائیل و نزیكەی هەزار و 160 كەسیان كوشت و نزیكەی 250 كەسیان بە بارمتەگرت هێشتا نزیكەی 132یان بارمتەن، لە فەڵەستینیش بەهۆی هێرشی ئیسرائیلەوە زیاتر لە 26 هەزار كەس كوژراون كە زۆربەیان سڤیلن.