عێراق نزیکەی 600 هەزار تۆن گەنمی جووتیارانی هەرێمی کوردستانی وەرگرتووە

ئاڤا نیوز

 

بەڕێوەبەری گشتیی بازرگانی هەرێمی کوردستان ڕایگەیاند، تاوەکو ئێستا حکومەتی عێراق زیاتر لە 558 هەزار تۆن گەنمی جووتیارانی هەرێمی کوردستانی وەرگرتووە.

 

وێنە گەورەکە: وەرگرتنی گەنمی ئەمساڵ، لە 6ی مانگی حوزەیرانەوە دەستی پێکردووە، بڕیارە تاوەکو 45 ڕۆژ بەردەوام بێت، بەگوێرەی ڕێککەوتنی نێوان حکومەتی عێراق و هەرێمی کوردستان، بڕیارە ئەم ساڵ 700 هەزار تۆن گەنمی جووتیارانی هەرێمی کوردستان وەربگیرێت، بۆ هەر تۆنێکش بڕی 850 هەزار دینار دەدرێت بە جووتیاران.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی هەرێم  بە ئاڤا نیوزی ڕاگەیاند: "ئەم ساڵ پرۆسەکە زۆر باشە و تاوەکو ئێستا زیاتر لە 558 هەزار تۆن گەنم لە جووتیارانی هەرێمی کوردستان وەرگیراوە، حکومەتی عێراق نزیکەی 70 ملیار دیناری بۆ جووتیارانی هەرێمی کوردستان ناردووە".

 

ژمارەکان وا دەڵێن: دوا چەکی پارەی جووتیارانی هەرێمی کوردستان کە وەرگیراوە 10 ملیار دیناری بووە:

-    سێ ملیار دینار بۆ جووتیارانی هەولێر
-    پێنج ملیار دینار بۆ جووتیارانی سلێمانی
-    دوو ملیار دینار بۆ جووتیارانی دهۆک

 

باکگراوند: ساڵی ڕابردوو بەغدا 500 هەزار تۆن گەنمی جووتیارانی هەرێمی کوردستانی وەرگرتووە و ساڵانەش ئەو بڕە گۆڕانکاری بەسەردا دێت.