هەواڵێکی ناخۆش بۆ هەوادارانی قاوە؛ نرخی دەگاتە بەرزترین ئاست

ئاڤا نیوز

لە ماوەی یەک ساڵی ڕابردوودا نرخی قاوە لەسەر ئاستی جیهان بە ڕێژەی 70٪ بەرزبووەتەوە، پێشبینیش دەکرێت زیاتر بەرزبێتەوە. 

چیرۆکی سەرەکی: کۆمپانیای لافاتزای ئیتاڵی تایبەت بە قاوە پێشىینی دەکات نرخی قاوە بۆ بەرزترین ئاست بەرزبێتەوە. 

هۆکارە زانراوەکان: پێشبینییەکە لەسەر چەند بنەمایەک کراوە؛ گۆڕانی کەشوهەوا، کێشەکانی پەیوەست بە گواستنەوەی جیهانی، بەرزکردنەوەی پێناسی گومرگی لەلایەن یەکێتیی ئەوروپا، کەمبوونەوەی بەروبوومی قاوە لە وڵاتە سەرەکییە بەرهەمهێنەرەکان کە زۆربەیان دەکەونە باشووری ڕۆژهەڵاتی ئاسیا. 

ئەوەی پێویستە بیزانیت: گرێبەستەکانی داهاتووی ڕۆبۆستا کە پێوەری جیهانییە بۆ قاوە، بۆ چوار هەزار و 844 دۆلار بۆ هەر تۆنێک بەرزبووەتەوە. هاوکات بەدرێژایی ساڵی ڕابردوو نرخی قاوە بە ڕێژەی 70٪ بەرزبووەتەوە.

ڕاگەیێنراوی فەرمی: جۆزێبی لافاتزا، سەرۆکی گرووپی لافاتزا کە خاوەنداری قاوەی لافاتزا دەکات، دەڵێت نرخی قاوە بەدرێژایی ئەمساڵ نزیکەی 15٪ بەرزبووەتەوە. پێشبینیش دەکات ساڵی داهاتوو بە ڕێژەی 10٪ـی دیکە بەرزبێتەوە.