ئەنجوومەنی وەزیران داوای خەرجکردنی دوو مووچەی هێزە ئەمنییەکان لە بەغدا دەکات

ئاڤا نیوز

ئەنجوومەنی وەزیران جەخت دەکاتەوە دامەزراوەکانی هەرێمی کوردستان پابەندییەکانی خۆیان لەبارەی مووچە بەجێگەیاندووە، بۆیە داوای خەرجکردنی مووچەی مانگەکانی پێنج و شەشی پێشمەرگە و هێزە ئەمنییەکان لە بەغدا دەکات. 

چیرۆکی سەرەکی: بەسەرپەرشتی سەرۆکوەزیران مەسرور بارزانی، ئەنجوومەنی وەزیرانی هەرێمی کوردستان لە کۆبوونەوەی هەفتانەیدا پرسی مووچە و یەکخستنی دەروازە سنوورییەکان لەگەڵ عێراق و چەند بابەتێکی دیکەی تاوتوێ کرد.

ڕاگەیێنراوی فەرمی: لەبارەی مووچە ئەنجوومەنی وەزیران وێڕای جەختکردنەوە لە هەڵوێستی حکومەتی هەرێمی کوردستان کە خوازیاری چارەسەری ڕاستەقینەی سەرجەم بابەتە هەڵپەسێردراوەکانە، باسی لەوەی کردووە ئەرکی حکومەتی فیدڕاڵە شایستەکانی هەرێمی کوردستان خەرج بکات هاوتای ناوچەکانی دیکەی عێراق و چیتر خەرجکردنی مووچە دوانەکەوێت.

زانیاریی زیاتر: ئەنجوومەنی وەزیران داوا لە حکومەتی فیدڕاڵ دەکات هەرچی زووە مووچەی پێشمەرگە و هێزە ئەمنییەکانی بۆ هەردوو مانگی 5 و 6 خەرج بکات. داواش دەکات شایستەکانی دیکەی هەرێم لە تەرخانکراوەکانی تەشغیلی و پڕۆژەکانی ئاوەدانکردنەوە و وەبەرهێنان خەرج بکات.

لەلایەکی دیکەوە: لە کۆبوونەوەکەدا دەرئەنجامی کۆبوونەوەی هاوبەشی هەردوو حکومەتی فیدراڵ و هەرێم سەبارەت بە دەروازە سنوورییەکان خراوەتەڕوو، ئەنجوومەنی وەزیران لیژنەی دانوستانکاری ڕاسپاردووە لە چوارچێوەی دەستوور و یاسا بەرکارەکان درێژە بە گفتوگۆ بدەن.

چارەسەر: لیژنەیەکی یاسایی پسپۆڕ ڕاسپێردراوە بۆ ڕێککەوتن لەبارەی داڕشتنی میکانیزمی هەماهەنگی لەگەڵ دامەزراوە فیدراڵییەکانی عێراق بۆ هەموارکردنەوەی یاسای تایبەت بە دەستەی دەروازە سنوورییەکان.