لەبارەی بڵاوبوونەوەی "ڤایرۆس لەنێو کێڵگە پەلەوەرییەکان" دڵنیایی دەدرێت

ئاڤا نیوز

 

بەڕێوەبەری کشتوکاڵی هەولێر دڵنیایی لەبارەی بڵاوبوونەوەی نەخۆشی لە کێڵگە پەلەوەرییەکانی هەولێر دەدات و دەڵێت کاریگەرییەکی ئەوتۆی نابێت.

 

وێنە گەورەکە: نرخی مریشک لە بازاڕەکانی هەرێمی کوردستان گران بووە و ئێستا کیلۆی بە نزیکەی سێ هەزار و 500 دینار دەفرۆشرێت، یەکێک لە هۆکارەکانیشی دەنگۆی بڵاوبوونەوەی ڤایرۆسە.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤا نیوزی ڕاگەیاند: "ساڵانە لەگەڵ هاتنی وەرزی هاوین و بەرزبوونەوەی پلەکانی گەرما، نەخۆشیی ڤایرۆسی لەنێو کێڵگەکانی پەلەوەر بڵاودەبنەوە، بەڵام نەخۆشییەکە کاریگەری هێندە نییە و پێویست بە ترس ناکات".

 

زانیاریی زیاتر: بەگوتەی هێمن سەید موراد، بەهۆی ترس لە بڵاوبوونەوەی نەخۆشی، خاوەن کێڵگەکانی پەلەوەر ژمارەیەکی کەمتری مریشک لە هۆڵەکان دەهێڵنەوە، بەو هۆیەوە لەم وەرزە هەر کیلۆیەک مریشک 500 دینار تاوەکو 750 دینار گرانتر دەبێت.

لەلایەکی دیکەوە: هاوینان بەهۆی بەرزبوونەوەی پلەی گەرما، بەخێوکردنی جووجەڵە پێویستی بە سووتەمەنی زیاتر دەبێت بۆ بەرهەمهێنانی کارەبا و فێنککردنەوەی هۆڵەکانیان، بەمەش نرخی جووجەڵە  بەرز دەبێتەوە، ئەمەش ڕاستەخۆی کاریگەری لەسەر گرانبوونی نرخی مریشک دەبێت.

 

باکگراوند: هەرێمی کوردستان ساڵانە پێویستی بە 146 هەزار تۆن گۆشتی مریشکە، بەڵام لە نێوخۆ زیاتر لە 250 هەزار تۆن بەرهەم دەهێنرێت، لەو بڕە زیاتر لە 100 هەزار تۆنی هەناردەی پارێزگاکانی عێراق دەکرێت.