وەزیری بەرگریی تورکیا دوا پەیام دەداتە یەکێتی: ئەم دوو بژارە هەڵبژێرن

ئاڤا دیجیتاڵ

 

ئێوارەی ئەمڕۆ یەشار گولەر، وەزیری بەرگریی تورکیا لەگەڵ قوباد تاڵەبانی کۆبووەوە. پەیامێکی تووند و یەکلاییکەرەوەی تورکیای لەڕێی قوباد تاڵەبانییەوە بە یەکێتی داوە لەبارەی پەیوەندیی یەکێتیی نیشتمانیی کوردستان و پارتی کرێکارانی کوردستان.

 

زانیارییە بەدەستهاتووەکان: لەو کۆبوونەوەیەدا وەزیری بەرگریی تورکیا، بە قوباد تاڵەبانی، جێگری سەرۆکوەزیرانی هەرێمی کوردستان و ئەندامی مەکتەبی سیاسیی یەکێتی گوتووە: "لەنێوان بەرەی پشتیوان لە پەکەکە و دژی پەکەکە یەکێکیان هەڵبژێرن و بژارەی سێیەمتان نییە".

 

چی ڕوودەدات: وەزیری بەرگریی تورکیا جەختیکردووەتەوە، کە ئەگەر یەکێتی خۆیان یەکلایی نەکەنەوە، ئەوا بەردەوام دەبن لە تووندکردنی گەمارۆکانیان لەسەر سلێمانی.

 

بۆچی گرنگە: نزیکەی ساڵێکە بەهۆی پەیوەندیی نێوان یەکێتیی نیشتمانیی کوردستان و پارتی کرێکارانی کوردستان (پەکەکە)، تورکیا گەمارۆی خستووەتە سەر فڕۆکەخانەی سلێمانی و ناوبەناویش سنووری پارێزگای سلێمانی بۆردوومان دەکات، ئەگەر یەکێتی بەدەم داواکەی تورکیاوە نەچێت، چاوەڕوان دەکرێت دۆخەکە سەختتر بێت.   

 

لەلایەکی دیکەوە: تورکیا یەکەم جار نییە لەسەر بابەتی پەیوەندییان لەگەڵ پەکەکە هۆشداریی دەداتە یەکێتی. سەرەتای ئەم هەفتەیەش هاکان فیدان، وەزیری دەرەوەی تورکیا ڕایگەیاند "ئەگەر یەکێتی خۆی لە پەکەکە بەدوور نەگرێت، دەچێتە بەرەی دووژمنەوە".