دەست بە ڕێکارەکانی هاوتاکردنی مووچەی خانەنشینان دەکرێت

ئاڤا نیوز

 

سەرۆکوەزیران بارزانی لە کۆبوونەوەی ئەمڕۆی ئەنجوومەنی وەزیران ئاماژەی بەوە کردووە، هەنگاوی کردەیی بۆ هاوتاکردنی مووچەی خانەنشینانی هەرێمی کوردستان لەگەڵ خانەنشینانی عێراق بنرێت.

 

وێنە گەورەکە: ئەنجوومەنی وەزیران بە سەرپەرشتیی سەرۆکوەزیران بارزانی کۆبووەوە و سێ تەوەری هەنووکەیی تاوتوێ کران، یەکێک لە تەوەرەکان هاوتاکردنی مووچەی خانەنشینانی هەرێمی کوردستان بوو لەگەڵ خانەنشینانی عێراق.

 

لێدوانی فەرمی: پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی گوت: "سەرۆکوەزیران بارزانی، لە کۆبوونەوەی ئەمڕۆدا وەزیری دارایی ڕاسپارد گفتوگۆ لەگەڵ عێراق بکات بۆ هاوتاکردنی مووچەی خانەنشینانی هەرێمی کوردستان لەگەڵ خانەنشینانی عێراق".

 

ئەوەی پێویستە بیزانیت: لیستی خانەنشینان بەتەواوی ئامادەکراوە، پێشتر وەزیری دارایی هەرێمی کوردستان و وەزیری دارایی عێراق گفتوگۆیان لەبارەیەوە کردووە و لەلایەن  بەغداوە ڕەزامەندی لەسەر دراوە.

 

زانیاریی زیاتر: بڕیارەکە نزیکەی 150 هەزار خانەنشین دەگرێتەوە، بڕی زیادبوونی مووچەیان لە 50 هەزارەوە بۆ 280 هەزار دینار دەبێت و ساڵی خزمەت و بڕوانامەش هەژمار دەکرێت.