چوار ملیۆن عێراقی لە ناوچە زێدەڕۆکان دەژین

ئاڤا نیوز

 

نزیکەی چوار ملیۆن هاووڵاتی عێراقی لە شوێنە هەڕەمەکی و زێدەڕۆکانی بەغدا ژیان دەکەن.

 

وێنە گەورەکە: بەهۆی نەبوونی یەکەی نیشتەجێبوون و خراپیی باری داراییان، بەشێکی زۆر لە هاووڵاتیانی عێراق پەنا دەبەنە بەر ناوچە زێدەڕۆ و هەڕەمەکییەکان، ژمارەی ئەو هاووڵاتیانەش لەزیادبوون دایە. 

 

لێدوانی فەرمی: عەبدولزەهرە هنداوی، گوتەبێژی وەزارەتی پلاندانانی عێراق بە ئاڤا نیوزی گوت، "530 هەزار یەکەی نیشتەجێبوون لە چوار هەزار ناوچەی زێدەڕۆ لە پارێزگاکانی عێراقدا هەن، بەشێوەیەک کە سێ ملیۆن و 800 هەزار هاووڵاتی تێدا دەژین".

 

هۆکارە زانراوەکان: بە گوێرەی قسەکانی هنداوی، کەمیی یەکەی نیشتەجێبوون و بەرزبوونەوەی ژمارەی دانیشتوان هۆکاری سەرەکیی بوونی ئەو ناوچانەن، لاوازیی یاساکان لەبارەی سنووردارکردن و دروستکردنی ئەو شوێنانە بەشێکی دیکەی هۆکارەکانن. 

 

چارەسەرەکان: عەبدولزەهرە پێی وایە دەبێت یاسایەک لەمبارەیەوە هەبێت بۆ ڕێکخستنی ئەو ناوچانە و تاپۆکردنی زەوییەکان و دروستکردنی زیاتری شارەکانی نیشتەجێبوون.