سەرۆک بارزانی و سوودانی پرسی پێکهێنانی حکومەتی خۆجێیی کەرکووک تاوتوێ دەکەن

ئاڤا نیوز

یەکێک لە تەوەرەکانی کۆبوونەوەی سەرۆک بارزانی و سەرۆکوەزیرانی عێراق، یەکلاییکردنەوەی پرسی پێکهێنانی حکومەتی خۆجێیی کەرکووکە. وا بڕیارە دوای ئەو کۆبوونەوەیە، سوودانی سەردانی کەرکووک بکات و لەگەڵ لایەنە براوەکانی هەڵبژاردن کۆببێتەوە.

وێنە گەورەکە: سێ کۆبوونەوە بەسەرپەرشتی محەممەد شیاع سوودانی لە بەغدا بەڕێوەچوون و سەرجەمیان بێ ئەنجام بوون، لە چەند ڕۆژی داهاتوو سوودانی بۆ کردنەوەی وێستگەی کارەبای دووبز سەردانی پارێزگاکە دەکات و لەگەڵ لایەنە براوەکانی هەڵبژاردنی ئەنجوومەنی پارێزگای کەرکووکیش کۆدەبێتەوە.

ئەمەش بزانە: ئەمڕۆ سەرۆک بارزانی سەردانی بەغدا دەکات و سەرکردەی زۆربەی لایەنە سیاسییەکانی عێراق دەبینێت، پێکنەهێنانی حکومەتی خۆجێیی پارێزگای کەرکووک، دۆسیەی شنگال، کێشەی زەویوزاری ناوچە دابڕرێنراوەکان بەشێکن لەو تەوەرانەی کە لە کۆبوونەوەکان باسیان دەکات، یەکەم کۆبوونەوەشی لەگەڵ سوودانی دەبێت.

لێدوانە فەرمییەکان: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە ئاڤا نیوزی گوت، "هەنگاوەکان ئەرێنین و لایەنەکان لە تێگەشتنی هاوبەش و ڕێککەوتن نزیکن."

ئیسماعیل حەدیدی، ئەندامی هاوپەیمانیی عەرەبی بۆ ئاڤا نیوز گوتی: "دەمانەوێ پۆستەکە لای عەرەب بمێنێتەوە، بە پێشنیازی دوو ساڵ بە دوو ساڵیش ڕازین."

قەحتان وەنداوی، بەرپرسی لقی کەرکووکی بەرەی تورکمانی بۆ ئاڤا نیوز دەڵێت،:"سوورین لەسەر بۆچوونی خۆمان و دەبێت پۆستی پارێزگار بە شێوازی خول لەنێوان سەرجەم پێکهاتەکان بێت."

بۆچی گرنگە: حەوت مانگ بەسەر هەڵبژاردنی ئەنجوومەنی پارێزگاکانی عێراق تێدەپەڕێت، کەرکووک تاکە پارێزگایە حکومەتی خۆجێیی پێکنەهێناوە. کورد زۆرینەی کورسییەکانی پارێزگای کەرکووکی بەدەستهێناوە، چاوی لە وەرگرتنەوەی پۆستی پارێزگارە، کە لە دوای ڕووداوەکانی 16ی ئۆکتۆبەری 2017 لەدەستی داوە.ا