نێوەڕۆکی کۆبوونەوەی هەولێر و بەغدا لەبارەی دەروازە سنوورییەکان

ئاڤا نیوز

 

لە کۆبوونەوەی ئەمڕۆدا هەولێر و بەغدا لەبارەی پرسی دەروازە سنوورییەکان نەگەیشتوونەتە ڕێککەوتن، یەکێک لە بەشداربووانی کۆبوونەوەکە دەڵێت: پرسەکە ئاڵۆزە و پێویستمان بە کۆبوونەوەی زیاترە.

وێنە گەورەکە: ئەمڕۆ دووشەممە شاندی هەرێمی کوردستان بە بەشداریی ڕێبەر ئەحمەد، وەزیری ناوخۆ و ئاوات شێخ جەناب، وەزیری دارایی و ئابووری لەگەڵ شاندی حکومەتی عێراق لە بەغدا لەبارەی پرسی دەروازە سنوورییەکان کۆبوونەوە.

 

لێدوانی فەرمی: ساماڵ عەبدولڕەحمان، بەڕێوەبەری گشتیی دەروازە سنوورییەکانی هەرێمی کوردستان کە یەکێک بوو لە بەشداربووانی کۆبوونەوەکە بە ئاڤا نیوزی گوت: نەگەیشتینە ڕێککەوتن و ئەمڕۆ شاندەکە دەگەڕێتەوە، بەڵام کۆبوونەوەکانمان بەردەوام دەبن". باسی لەوەش کرد باسی داهاتی خاڵە سنوورییەکان نەکراوە.

بابەتی ستراتیژی: عێراق داوای ڕادەستکردنی ئیدارەدانی دەروازەکان بەپێی یاسای ژمارە 30ی ساڵی 2016 دەکات، بەڵام هەرێمی کوردستان داوای هەموارکردنی یاساکە دەکات. یاساکە باس لەوە دەکات دەروازەکان لەڕووی کارگێڕی و ئەمنییەوە بە هەماهەنگی لەگەڵ هەرێمی کوردستان بەڕێوەببرێن.

ئەوەی پێویستە بیزانیت: بڕیارە لە ئایندەدا لیژنەیەکی عێراق سەردانی دەروازەکان بکات، تا تێبینبییەکانی خۆیان لە چوارچێوەی ڕاپۆرتێک بۆ کۆبوونەوەکانی داهاتوو ئامادە بکەن.