پڕۆژە گەورەکەی هەڵەبجە؛ چیتر گەنمی جووتیاران تێکناچێت

ئاڤا نیوز

 

سایلۆ نوێیەکەی هەڵەبجە، بەرهەمی گەنمی جووتیاران لە تێکچوون دەپارێزێت و سوودێکی زۆریان پێ دەگەیێنێت.

 

چیرۆکی سەرەکی: کاتژمێر 11:00ـی بەیانیی ئەمڕۆ یەکشەممە سەرۆکوەزیران بارزانی بەردی بناغەی سایلۆی هەڵەبجە دادەنێت.

 

وێنە گەورەکە: ساڵانە گەنمی جووتیارانی هەڵەبجە لە بنکەیەک وەردەگیرێت، گەنمەکە لە شوێنی هەڵگرتنیدا زۆر پارێزراو نییە و بەردەوام بەشێکی تێکدەچێت، بۆیە پارێزگاکە پێویستی بە سایلۆیەکی مۆدێرن هەبوو.

 

لێدوانی فەرمی: ستار مەحموود، بەڕێوەبەری گشتیی کشتوکاڵی هەڵەبجە بە ئاڤا نیوزی گوت، لەو بنکەیەی ئێستا گەنمی تێدا هەڵدەگیرێت، تەنیا دەتوانن 20 بۆ 25 هەزار تۆن گەنم وەربگرن؛ لە ساڵانی ڕابردوودا هەندێکجار تووشی تەڕی و خراپبوون دەبوو، زۆرجاریش بەشێکی کە خۆر لێی دەدا ڕەنگ و بۆن و تامی تێکدەچوو.

 

ژمارەکان وادەڵێن: سایلۆکە لەسەر ڕووبەری زیاتر لە 50 دۆنم زەوی بە تێچووی نزیکەی 25 ملیار دینار دروست دەکرێت، وادەی تەواوکردنی 700 ڕۆژە و توانای کۆگاکردنی 40 هەزار تۆن گەنمی هەیە.