بەغدا پێشوازی لە 13 ملیۆن زیارەتکار دەکات

ئاڤا دیجیتاڵ

 

ملیۆنان موسڵمانی شیعەمەزهەب لە عێراق و وڵاتانی دیکە، بەشدارییان لە ڕێوڕەسمی "کۆچی دوایی ئیمام موسای کازم" لە بەغدا کرد؛ لە هەشت پارێزگای عێراقیش کراوەتە پشوو. 

 

وێنە گەورەکە: ساڵانە سەدان هەزار زیارەتکاری موسڵمانی شیعەمەزهەب، هەر لە ناوخۆی عێراق نا، لە دەرەوەش سەردانی بە‌غدا دەکەن، ئەو زیارەتکارە رەجەبییانە دەچنە مەزارگەی ئیمام کازم و یادی "کۆچی دوایی" ئیمامەکەیان دەکەنەوە.

 

زانیاریی زیاتر: ساڵی ڕابردوو سەدان هەزار زیارەتکار بەشداری مەڕاسیمەکانیان کردبوو، بۆ ئەمساڵیش پێشبینی دەکرێت ڕێژەکە زیاتر بێت. سێشەممە 6-2-2024 لە پارێزگاکانی بەغدا، واست، میسان، دیوانیە، بەسڕا، موسەننا، کەربەلا و زیقار بەهۆی ئەو یادەوە کرایە پشوو.

ئەمەش بزانە: بەرپرسانی مەزارگەی ئیمام موسای کازم ڕایانگەیاندووە، لە ماوەی چەند ڕۆژی ڕابردوودا زیاتر لە 13 ملیۆن زیارەتکار سەردانی مەزارگەکەیان کردووە.

محەممەد شیاع سوودانی، سەرۆکوەزیرانی عێراق سەرپەرشتیی دۆخی ئەمنی مەڕاسیمەکەی کرد و وەزیری ناوخۆی عێراقیش گوتی: "پلانی ئەمنی پەیوەست بە ڕێوڕەسمی ساڵڕۆژی کۆچی دوایی ئیمام موسای کازم سەرکەوتوو بوو".

 

باکگراوند: ئیمام موسای کازم، حەوتەم ئیمامی شیعەکانە لەنێو دوانزە ئیمامەکەی شیعە. ئیمام موسا لەدوای باوکی بووە ئیمام و 35 ساڵ ئیمامەتی کردووە. لە 25ـی ڕەجەبی ساڵی 183ـی کۆچی لە بەغدا ژەهرخواردکرا.