ڕووسیا و چین: ئەمریکا گرژییەکانی ڕۆژهەڵاتی ناوەڕاست زیاد دەکات

ئاڤا دیجیتاڵ

ڕووسیا و چین لە کۆبوونەوەی شەوی ڕابردووی ئەنجوومەنی ئاسایشدا، ئەمریکایان تۆمەتبار کرد بەوەی کە گرژییەکانی ڕۆژهەڵاتی ناوەڕاست هێندەی دیکە زیاد دەکات. ئەم تۆمەتانەش پاش هێرشی ئەم دواییەی ئەمریکا بۆ سەر گرووپەکانی سەر بە ئێران لە عێراق و سووریادا دێت.

 

چیرۆکە سەرەکییەکە: دوای هێرشەکانی ئەمریکا بۆ سەر پێگەکانی میلیشیاکانی ئێران، ڕووسیا داوای کۆبوونەوەی بەپەلەی ئەنجوومەنی ئاسایشی نەتەوەیەکگرتووەکانی کرد، شەوی ڕابردوو ئەنجوومەنی ئاسایش لەبارەی "هەڕەشەکان بۆ سەر ئاشتی و ئاسایشی نێودەوڵەتی" کۆبووەەوە.

 

لێدوانە فەرمییەکان: 

•    ڤازیلی نیبینزیا، باڵیۆزی ڕووسیا لە نەتەوەیەکگرتووەکان لە کۆبوونەوەکەدا ڕایگەیاند: "ڕوونە کە ئەمریکا بە هێرشە ئاسمانییەکانی بە شێوەیەکی دیاریکراو و بەمەبەست دەیەوێت ناکۆکییەکان زیاد بکات".

•    ژانگ جون، باڵیۆزی چین لە نەتەوەیەکگرتووەکان گوتی: "بێگومان کردەوەکانی ئەمریکا تۆڵەسەندنەوە و توندوتیژی لە ڕۆژهەڵای ناوەڕاستدا خراپتر دەکات".

•    ڕۆبێرت ود، جێگری باڵیۆزی ئەمریکا لە نەتەوەیەکگرتووەکان ڕایگەیاند: "با بە ڕوونی بیڵێم، ئەمریکا نایەوێت ناکۆکیی زیاتر لە ناوچەیەکدا هەبێت کە خۆی تیایدا بۆ کەمکردنەوەی ناکۆکییەکانی غەززە چالاکانە کار دەکات، هەروەها ئێمە هەوڵ نادەین ڕاستەوخۆ لەگەڵ ئێراندا بکەوینە کێشەوە، بەڵام بەردەوام دەبین لە بەرگریکردن لە کارمەندەکانمان لە دژی هەر هێرشێک".

 

گۆشەیەکی دیکەی دیمەنەکە: سەبارەت بە هێرشەکەی سەر بنکەی سەربازیی تاوەر22ـی ئوردن، ئەمیر سەعید ئیرڤانی، باڵیۆزی ئێران لە نەتەوەیەکگرتووەکان ڕایگەیاند: "هەر هەوڵێک بۆ ئەوەی ئەم کردەوانە بدرێنە پاڵ ئێران، هەوڵێکی چەواشەکارانە و بێبنەما و پەسەندنەکراوە، بەڵێن دەدەین ئەگەر ئاسایشی ئێران ڕووبەڕووی هەر هەڕەشە، یان هێرش، یان دوژمنکارییەک ببێتەوە، ئەوا ئێران دوودڵ نابێت لەوەی مافی خۆی بە کار بهێنێت و بەتووندی وەڵام بداتەوە".

 

باکگراوند: پریشکی ئاگری شەڕی حەماس ئیسرائیل کەم و زۆر بەر ناوچەکانی دیکەی ڕۆژهەڵاتی ناوەڕاستیش کەوتووە، بە تایبەتی لەلایەن چەکدارەکانی سەر بە ئێران لە لوبنان و عێراق و سووریا و یەمەن توندوتیژییەکان زیادیان کردووە؛ 28ـی کانوونی دووەم بنکەیەکی سەربازیی ئەمریکا لە ئوردن بە درۆن پێکرا و سێ سەربازی ئەمریکی کوژران و زیاتر لە 40 سەربازیش بریندار بوون، ڕۆژی هەینیش ئەمریکا لە تۆڵەی ئەو هێرشەدا چەند ناوچەیەکی گرووپە چەکدارەکانی سەر بە ئێرانی لە عێراق و سووریا بە ئامانج گرت.