لێدوانی نوێی ئەمریكا لەبارەی هێرشەكانی سەر عێراق

ئاڤا دیجیتاڵ

 

دوای هێرشەکانی ئەمریکا بۆ سەر عێراق، حکومەتی عێراق بێئاگایی خۆی لەو هێرشانە ڕاگەیاند و وەزارەتی دەرەوەی ئەمریکاش دەڵێت، ڕاستەوخۆ دوای هێرشەکە عێراقیان ئاگادار کردووەتەوە.

 

وێنە گەورەکە: 28ـی مانگی ڕابردوو هێرشکرایە سەر بنکەی تاوەر 22ـی ئوردن کە بووە هۆی کوژرانی سێ سەرباز و برینداربوونی دەیان سەربازی دیکە، ئەوکاتە ئەمریکا "هەڕەشەی تۆڵەسەندنەوە"ـی ئەو هێرشانەی کرد و شەوی هەینی 02-02-2024 هێرشەکانی دەستپێکرد و 85 پێگەی میلیشیاکانی لە ماوەی کەمتر لە کاتژمێرێک کردە ئامانج.

 

لێدوانی فەرمی: "ڕاستەوخۆ دوای هێرشەكانی سەر گرووپە چەكدارەكانی نزیک لە ئێران، حکومەتی عێراقمان ئاگادار کردەوە". ڤێدانت پاتێل، جێگری گوتەبێژی وەزارەتی دەرەوەی ئەمریکا لە کۆنگرەیەکی ڕۆژنامەوانیدا وای گوت.

 

گوتیشی: "ئەو پێگەیانەی لەنێو خاکی عێراقدا کرانە ئامانج، بە وردی دیاریکراون و ڕەچاوی ئەوەمان کردووە زیان بە ژێرخانی سڤیل نەگات".

 

بۆچوونی لایەنی بەرامبەر: "ئاگاداری هێرشەکانی ئەمریکا بۆ سەر عێراق نەبووینە و ئەمریکا پێش هێرشەکە ئێمەی ئاگادار نەکردووەتەوە". باسم عەوادی، گوتەبێژی حکومەتی عێراق دوای هێرشەکانی ئەمریکا ئەمەی ڕایگەیاند. 

 

ئەوەی پێویستە بیزانیت: درەنگانی شەوی هەینی 02-02-2024 ئەمریکا 85 پێگەی میلیشیاکانی ئێرانی لە ناوچەکانی حەیدەرییە و شبلی لە دێرزوور، ناوچەکانی نێوان ئەلبوکەمال و مەیادین لە ڕۆژهەڵاتی سووریا و ناوچەی قائیم لە پارێزگای ئەنبار بۆردوومانکرد.

 

زانیاریی زیاتر: هەر دوای هێرشەکە حەشدی شەعبی ڕایگەیاند: "بەهۆی هێرشی ئەمریکا بۆ سەر پێگەکانیان لە عێراق 16 چەکداریان کوژراون و 25ـی دیکەش بریندار بوون".

 

پاشخان: لە تۆڵەی هێرشە درۆنییەکەی هەفتەی رابردووی سەر بنکەیەکی سەربازیی ئەمریکا لە ئوردن کە کوژرانی سێ سەربازی ئەمریکی و برینداربوونی 40ـی دیکەی لێکەوتەوە، شەوی هەینی ئەمریکا یەکەم ئۆپەراسیۆنی تۆڵەی دەستپێکرد و 85 بنکە و بارەگای گرووپە چەکدارەکانی لە عێراق و سووریا بۆردوومان کرد.