سعودیە کێشەی 15 هەزار حاجی کوردستان چارەسەر دەکات

ئاڤا نیوز

سعودیە کێشەی ئەو حاجیانە چارەسەر دەکات کە بە ڤیزای گەشتیاری و ڤیزای ساڵ سەردانی سعودیەیان کردووە، لەم بڕیارەش 15 هەزار هاونیشتمانی هەرێمی کوردستان سوودمەند دەبن.

 

وێنە گەورەکە: ئەمساڵ سەدان هەزار کەس لە سەرتاسەری جیهان بەبێ هەبوونی مۆڵەتی حەجکردن سەردانی سعودیەیان کرد، لە ڕۆژانی ڕابردووشدا  300 هەزاریان لە مەککە بۆ جەددە دوورخرانەوە، بەڵام ئێستا کێشەکەیان چارەسەر کراوە.

 

لێدوانی فەرمی: یەکێک لە ڕێکخەرانی کاروانی حاجیانی کوردستان لە سعودیە بە ئاڤا نیوزی گوت: ئەمڕۆ لەلایەن بازگەکانی سعودیە ئاسانکاری بۆ سەرجەم دوورخراوەکان دەکرێت و ڕێگەیان پێدەدرێت بگەڕێنەوە مەککە، حاجییەکان بە پاس دەگوازرێنەوە و 500 دۆلار وەک کرێی گواستنەوە لە هەر کەسێک وەردەگیرێت

ژمارەکان وادەڵێن: ئەمساڵ 4 هەزار و 685 کەس بەشێوەیەکی یاسایی سەردانی سعودیەیان کردووە بۆ بەجێهێنانی فەریزەی حەج،  تێچووی ڕێگەی وشکانی پێنج ملیۆن و 300 هەزار دینار و ڕێگەی ئاسمانیش شەش ملیۆن و 350 هەزار دینارە. تێچووی هەر حاجییەکیش لەو 15 هەزار کەسە لە نێوان  سێ هەزار  و 500 بۆ سێ هەزار و 800 دۆلارە.