بۆ كەمكردنەوەی قەرەباڵخی دوو ئۆڤەرپاس لەسەر دووسایدی پیرمام دروست دەکرێن

ئاڤا نیوز

 

جێگری پارێزگاری هەولێر ڕایگەیاند، پلانیان بۆ دروستکردنی دوو ئۆڤەرپاس لەسەر دووسایدی پیرمام داناوە تاوەکو قەرەباڵخی ئەو ڕێگەیە كەم بكەنەوە.

 

چی ڕوودەدات: بەهۆی دروستکردنی پڕۆژەکانی نیشتەجێبوون و هاتووچۆیەكی زۆر لەسەر دووسایدی پیرمام، قەرەباڵخییەكی زۆر لەسەر شەقامەکە دروست بووە و ئەوەش گلەیی و گازەندەی زۆری بەدوای خۆیدا هێناوە.

 

لێدوانی فەرمی: هێمن قادر، جێگری پارێزگاری هەولێر، بە ئاڤا نیوزی گوت: داوا لە خاوەن پڕۆژەکانی نیشتەجێبوون کراوە تاوەکو هاوكار بن لە چارەسەری ئەو قەرەباڵخییە و دوای ئامادەبوونی ئەوانیش، پلان دانراوە لەسەر خەرجی ئەوان، دوو ئۆڤەرپاس لەو شوێنانە دروست بکرێت کە پێویستیان بە ئۆڤەرپاسە، یەکەمیان دوای شەقامی 120 مەتری بە ئاراستەی پیرمامە و دووەمیشیان لە سایدی گەڕانەوە بۆ ناو شارە لە نزیک کۆمەڵگەی شاوێس.

 

زانیاری بەدەستهاتوو: بەڕێوەبەرایەتییە گشتییەکانی وەبەرهێنان و شارەوانیی هەولێر لەگەڵ بەڕێوەبەرایەتییەکانی ئەندازەی هاتوچۆ و نەخشەدانان و ئاوەدانکردنەوە، دیزاینی ئۆڤەرپاسەکانیان تەواو کردووە، ئێستا لایەنی هونەری سەرقاڵی ئامادەكارین لەسەر هەردوو ئۆڤەرپاسەكە.