ناوی تووشبووانی ئۆتیزم بۆ تۆماركردن دەنێردرێتە بەغدا

ئاڤا نیوز

وەزیری کار و کاروباری کۆمەڵایەتی حكومەتی هەرێمی كوردستان ڕایگەیاند "ئەو تووشبووانەی ئۆتیزم کە ناویان تۆمار نەکراوە, بۆ بەغدا دەنێردرێن و مووچەیان بۆ دابین دەکرێت".

وێنە گەورەکە: بڕیار وایە چەند سەنتەرێکی دیکەی ئۆتیزم لە قەزاکانی هەرێمی کوردستان بکرێنەوە و تووشبووانی ئۆتیزم ئامادە بکرێن بۆ ئەوەی لە قوتابخانەکانی سەر بە وەزارەتی پەروەردە وانە بخوێنن.

لێدوانی فەرمی: کوێستان محەممەد، وەزیری کار و کاروباری کۆمەڵایەتی لە کاتی کردنەوەی سەنتەرێکی تایبەت بە تووشبووانی ئۆتیزم لە کۆیە ڕایگەیاند، "ساڵی ڕابردوو 20 منداڵی ئۆتیزم لە هەولێر چوونەتە بەر خوێندن کە ئەمە دەسکەوتێکی گرنگە، لە پاڵ منداڵانی ئۆتیزم خول بۆ خێزانەکانیش دەکرێتەوە تاوەکو ئاشنای ڕاهێنانەکانی ئێمە بن".

زانیاریی زیاتر: "ناوی هەموو ئەو منداڵانە نووسراون کە پێشتر تۆمار نەکراون و ڕەوانەی وەزارەتی دارایی عێراق کراون بۆ ئەوەی مووچەیان بۆ دابین بکرێت". وەزیری کار و کاروباری کۆمەڵایەتی وایگوت.

ئەوەی پێویستە بیزانیت: لە هەرێمی کوردستان سێ هەزار و 665 منداڵی ئۆتیزم تۆمار کراون، 52 سەنتەری ئۆتیزمیش هەن کە نۆیان حکومین. لە چوار ساڵی کابینەی نۆیەم، شەش سەنتەر کراونەتەوە.