گۆڕان: ئەوانەی لە گۆڕان جیابوونەوە لە ئاستی چاوەڕوانی خەڵک دا نەبوون

ئاڤا نیوز 

گوتەبێژی بزووتنەوەی گۆڕان ڕایگەیاند، ئەو کەسانەی لە گۆڕان جیابوونەوە، نەیانتوانیوە لە ئاستی چاوەڕوانیی خەڵک دا بن.

وێنە گەورەكە: دوای کۆچی دوایی نەوشێروان مستەفا، ئاستی جەماوەريی  گۆڕان بە شێوەیەکی بەرچاو کەمی کردووە، بۆیە ئەم بزووتنەوەیە هەوڵی ئاشتکردنەوە و گەڕاندنەوەی ئەو کەسانە دەدات کە وازیان لە هێناوە یان نیگەرانن.

لێدوانی فەرمی: دلێر عەبدولخالق، گوتەبێژی بزووتنەوەی گۆڕان، بە ئاڤا نیوزی گوت: "ئەو کارەکتەرانە نەیانتوانی لە دەرەوەی بزووتنەوەکە لە ئاستی چاوەڕوانی خەڵک بن و جیابوونەوە و دووبەرەکیش هیچی لێ شین نابێت، بزووتنەوەی گۆڕانیش وەک پێویست هەنگاوی نەناوە ".

هۆكارە زانراوەكان: گوتەبێژی گۆڕان، هۆکاری ئاشتکردنەوەی ئەندامە زویر و ڕۆیشتووەکانیان بۆ "خۆئامادەکردن بۆ هەڵبژاردن"  دەگەڕێنێتەوە و دەڵێت "خوازیارین لەمپەرەکانی بەردەم هەڵبژاردن لاببرێت".

زانیاریی زیاتر: "گرنگە دەنگدەران بە ئومێدەوە لەم هەنگاوە بڕوانن، بۆ ئەوەی بتوانین بەشێک لەو دەنگانەی پێشتر لەدەستمان داون، بەدەستیان بهێنینەوە". دلێر عەبدولخالق وای گوت.