دەوڵەتی یاسا پشتگیریی خۆی بۆ مەشهەدانی ڕادەگەیێنێت

ئاڤا نیوز 

 

سەرۆکی فراکسیۆنی دەوڵەتی یاسا لە ئەنجوومەنی نوێنەرانی عێراق پشتگیریی پارتەکەی بۆ مەحموود مەشهەدانی دووپات دەکاتەوە.

 

وێنە گەورەكە: دوای چوار جار هەوڵدان بۆ هەڵبژاردنی سەرۆکی پەرلەمانی عێراق لە ماوەی شەش مانگی ڕابردوو، هێشتا جێگرەوەی حەلبووسی دیاری نەکراوە، ڕۆژی 18ـی ئەم مانگەش بۆ یەکلاکردنەوەی ئەو پۆستە دیاری کراوە.

 

لێدوانی فەرمی: یاسر مالکی، سەرۆکی فراکسیۆنی هاوپەیمانێتیی دەوڵەتی یاسا لە ئەنجوومەنی نوێنەرانی عێراق لە پلاتفۆڕمی ئێکسدا ڕایگەیاندووە: دوای بەرەوپێشچوونە ئەرێنییەکانی گفتوگۆی کوتلە سیاسییەکان، پشتگیریی بەڕێوەچوونی دانیشتنی هەڵبژاردنی سەرۆکی ئەنجوومەنی نوێنەران دەکەن.

 

زانیاریی زیاتر: پشتیوانیی خۆمان بۆ مەحموود مەشهەدانی ڕادەگەیێنین کە بەربژێری زۆرینەی پەرلەمانتارانی سوننەیە. یاسر مالکی وا دەڵێت.

 

لەلایەکی دیکەوە: شەوی ڕابردوو نووسینگەی ڕاگەیاندنی پارتی تەقەدووم ڕایگەیاند: "پشتیوانی خۆمان بۆ بەربژێرکردنی مەحموود مەشهەدانی بۆ وەرگرتنی پۆستی سەرۆکی ئەنجوومەنی نوێنەران ڕادەگەیێنین".