لە عێڕاق ڕۆژانە زیاتر لە 300 حاڵەتی جیابوونەوە تۆمار دەکرێت

ئاڤا نیوز

 

ئەندامێکی لیژنەی یاسایی لە پەرلەمانی عێراق دەڵێت، حاڵەتەکانی جیابوونەوەی هاوژینان لە عێراق ڕۆژانە 300 حاڵەتی تێپەڕاندووە و پێشنیازی ئەوە دەکات یاسایەکی باری کەسێتی هەمووار بکرێتەوە.

 

لێدوانی فەرمی: محەممەد خەفاجی، ئەندامی لیژنەی یاسایی لە پەرلەمانی عێراق گوتی: ڕۆژانە زیاتر لە 300 حاڵەتی جیابوونەوە تۆمار دەکرێت، بەرزبوونەوەی ئەو ئامارانەش جێگەی هەڵوێستەکردنە و کاریگەری لەسەر کۆمەڵگەی عێراقی هەیە.

 

ئەوەی پێویستە بیزانیت: خەفاجی داوا دەکات ماددەی 57ـی یاسای باری کەسێتی هەمووار بکرێتەوە کە "چارەسەرێکی سەرکەوتوو و گونجاوە، بەو پێیەی باس لە دادپەروەری دەکات بەرامبەر بە ژن و پیاو لە مافی سەرپەرشتیکردنی منداڵ کە ئێستا سەرپەرشتیکردنەکە تەنها بۆ دایکەکەیە."

 

ئەمەش بزانە: بەپێی ئاماری ئەنجوومەنی دادگەی باڵای عێراقی، لە مانگی ئازاری ئەمساڵ، لە پارێزگاکانی عێراق جگە لە هەرێمی کوردستان، لە کۆی 24هەزار و 88 حاڵەتی هاوسەرگیری، 6هەزار و 222 حاڵەتی جیابوونەوە تۆمار کراوە.