هەفتەی داهاتوو هەولێر و بەغدا لەسەر وەرگرتنی گەنمی جووتیاران ڕێکدەکەون

ئاڤا نیوز

 

شاندێکی وەزارەتی کشتوکاڵ و سەرچاوەکانی ئاو بەمەبەستی یەکلاییکردنەوەی وەرگرتنی گەنمی جووتیاران سەردانی بەغدا دەکات.

 

وێنە گەورەکە: لە بەشێکی پارێزگاکانی عێراق پرۆسەی وەرگرتنی گەنمی جووتیاران دەستیپێکردووە، حکومەتی هەرێمی کوردستان ڕژدە لەسەر ئەوەی، هاوشێوەی جووتیارانی ناوەڕاست و خوارووی عێراق مامەڵە لەگەڵ جووتیارانی هەرێمی کوردستان بکرێت.

 

لێدوانی فەرمی: هیوا عەلی، گوتەبێژی وەزارەتی کشتوکاڵ و سەرچاوەکانی ئاوی هەرێمی کوردستان بە ئاڤا نیوزی ڕاگەیاند: "بەغدا پێشنیازی بڕێکی کردووە کە ئەمساڵ لە جووتیارانی هەرێمی کوردستان وەریگرێت، بەڵام ئەو پێشنیازە ڕەتکراوەتەوە و لە کۆبوونەوەی داهاتوو لەسەر بڕی وەرگیراوی گەنم ڕێککەوتن دەکرێت".

 

ئەوەی پێویستە بیزانیت: ئەمساڵ عێراق شەش ملیۆن تۆن گەنم لە سەرجەم جووتیاران وەردەگرێت، بەرهەمی جووتیارانی هەرێمی کوردستان زیاتر لە یەک ملیۆن و نیو تۆن دەبێت.