زیانە ئابوورییەکانی غەززە سێ ملیار دۆلاری تێپەڕاند

ئاڤا نیوز
 
نزیکەی حەوت مانگە شەڕ لە غەززە بەردەوامە، جگە لە زیانە مرۆییەکانیش، زیانە ئابوورییەکانی شەڕەکە سێ ملیار دۆلاری تێپەڕاند.

 

لێدوانی فەرمی: تارق زروب، وەزیری گواستنەوەی دەسەڵاتی فەلەستین گوتی: "ئەو زیانانەی کە هێزەکانی داگیرکەر بە کەرتی گواستنەوە لە کەرتی غەززەیان گەیاندووە، سێ ملیار دۆلاری تێپەڕاندووە".

 

ژمارەکان وادەڵێن:

• 945 کیلۆمەتر ڕێگەوبانی غەززە بەکەڵکی بەکارهێنان نایەن، کە دەکاتە 65%ـی ڕێگەوبانەکانی شارەکە، "تێچووی نۆژەنکردنەوەیان دوو ملیار دۆلارە".

 

• نزیکەی 60%ـی  ئۆتۆمبێلە مۆڵەتپێدراوەکانی کەرتی غەززە لەناوچوون،"کۆمسیۆنەکانی وەزارەتی گواستنەوە مەزەندە دەکەن کە هێزەکانی ئیسرائیل 55 هەزار ئۆتۆمبێلیان لە غەززە لەناوبردبێت".

 

• لەدوای حەوتی ئۆکتۆبەرەوە، 34 هەزار و 454 فەلەستینی کە لانیکەم 14 هەزار و 685 منداڵ و 9 هەزار و 670 ژن بوون، کوژراون و 77 هەزار و 575 کەسیش بریندار بوون.

 

• لە ئیسرائیل هەزار و 200 هاووڵاتیی ئیسرائیلی گیانیان لەدەست داوە و پێنج هەزار و 132 کەسیش برینداربوون.