حكومەتی هەرێمی كوردستان بڕیاری دا داهاتی نانەوتی بخرێتە سەر هەژماری عێراق

ئاڤا نیوز

 

ئەنجوومەنی وەزیرانی هەرێمی کوردستان ڕایدەگەیێنێت، وەزارەتی دارایی و ئابووری لیستی مووچەی مووچەخۆرانی بۆ وەزارەتی دارایی فیدڕاڵ ناردووە و پێویستە هاوشێوەی مانگی ڕابردوو، لەگەڵ مووچەی ناوچەکانی دیکەی عێراق، مووچەی هەرێمیش بنێردرێت.

وێنە گەورەکە: ئەمڕۆ چوارشەممە 24ی نیسانی 2024، بە سەرپەرشتی سەرۆک وەزیران مەسرور بارزانی، ئەنجوومەنی وەزیرانی هەرێمی کوردستان کۆبووەوە و چەند پرسێكی تاوتوێ كرد.

ڕاگەیێنراوی فەرمی: "نابێت هیچ بیانوو و پاساوێک بۆ وەزارەتی دارایی فیدڕاڵ بهێڵرێتەوە تا بکرێتە بیانوو بۆ خەرج نەکردنی مووچە و شایستە داراییەکانی هەرێم. وەزارەتی دارایی و ئابووری و شاندی دانوستانکارمان ڕاسپاردووە، ئەوەی لە یاسا بەرکارە فیدڕاڵییەکان دەستنیشان کراوە وەک بەشی گەنجینەی فیدڕاڵیی لە داهاتی نانەوتی بەدەستهاتوو لە هەرێم، بخرێتە سەر هەژمێری وەزارەتی دارایی فیدڕاڵ".

ئەوەی پێویستە بیزانیت: ئاوات شێخ جەناب وەزیری دارایی و ئابووری، لە کۆبوونەوەکەی ئەنجوومەنی وەزیرانی هەرێمی كوردستان، هەنگاوەکانی وەزارەتەکەی خستووتەڕوو بۆ مووچەی مانگی نیسان، ئاماژەی بەوەدا چاوەڕوان دەکرێت هاوشێوەی مانگی ڕابردوو، لەگەڵ مووچەی ناوچەکانی دیکەی عێراق بنێردرێت.