سوودانی: هیچ هێزێکی شەڕکەر لە عێراق نەماوە تاوەکو بکشێتەوە

ئاڤا نیوز

محەممەد شیاع سوودانی، سەرۆکوەزیرانی عێراق لە چوارچێوەی سەردانەکەی بۆ ئەمریکا، پرسی کشانەوەی هێزەکانی هاوپەیمانانی لە عێراق یەکلایی کردەوە و گوتی: هیچ هێزێکی شەڕکەر نەماوە تاوەکو بکشێتەوە.

وێنە گەورەکە: چوار ڕۆژە سوودانی لە واشنتنە، جگە لە جۆ بایدنی سەرۆکی ئەمریکا چاوی بە چەند بەرپرسێکی باڵای ئەو وڵاتە کەوتووە، پرسی ئەمنی و بوونی هێزەکانی هاوپەیمانان لەسەر خاکی عێراق کڕۆکی کۆبوونەوەکانی بوون.

لێدوانی فەرمی:  سوودانی لە نوێترین لێدوانیدا لە واشنتن گوتی: پرسی هێزەکانی هاوپەیمانان سێ ڕەهەند لەخۆدەگرێت: یەکەمیان هەڵسەنگاندن بۆ مەترسی داعش، دووەم هەڵسەنگاندن بۆ ژینگە و دۆخی دەوروبەر، سێیەم توانای هێزەکانی عێراق بۆ پاراستنی ڕەوشی ئەمنی ناوچەکە."

 

بابەتی ستراتیژی: سوودانی جەختی کردەوە کە هێزەکانی ئەمریکا لە عێراق کشاونەتەوە، جگە لە ڕاوێژکارانی سەربازی و تەکنیکی هیچ هێزێکی شەڕکەر لەسەر خاکی عێراق نەماوە تاوەکو قسە لەبارەی کشانەوەیان بکەن.