بانکەکان تاوەکو درەنگانی شەو بۆ دابەشکردنی مووچە کراوە دەبن

ئاڤا نیوز

 

بەرێوەبەری گشتیی بانکە بازرگانییەکانی هەرێمی کوردستان ڕایگەیاند، لە گشت بانکەکانی هەرێمی کوردستان دەست بە دابەشکردنی مووچەی مانگی سێ کراوە و هاونیشتمانیان دڵنیا دەکاتەوە کە تاوەکو سەرجەم مووچەخۆران مووچەکانیان وەردەگرن، بانکەکان کراوە دەبن.

 

وێنە گەورەکە: دابەشکردنی مووچەی مانگی سێ دەستیپێکردووە و بڕیارە تاوەکو دوو ڕۆژی دیکە مووچەی سەرجەم مووچەخۆرانی هەرێمی کوردستان دابەش بکرێت. 

 

لێدوانی فەرمی: مەولوود سابیر، بەرێوەبەری گشتیی بانکە بازرگانییەکانی هەرێمی کوردستان بۆ ئاڤا نیوز گوتی: ئاگاداری سەرجەم بانکەکانی هەرێمی کوردستان کراوەتەوە، کە ژمارەیان 94 بانکە؛ پێویستە فەرمانبەرانیان تاوەکو دابەشکردنی مووچەی سەرجەم مووچەخۆران لە دەوام بمێننەوە و بانکەکان کراوەبن.

 

بۆچی گرنگە: دوای ئەوەی سەرۆکوەزیران بارزانی ڕێککەوتنی لەبارەی مووچە لەگەڵ بەغدا ڕاگەیاند، بڕیاری دابەشکردنی مووچەی مانگی سێ درا و تاوەکو پێش جەژنی ڕەمەزان سەرجەم مووچەخۆران مووچەکانیان وەردەگرن.

 

ئەوەی پێویستە بیزانیت: ئێستا بانکەکانی سلێمانی و دهۆک کارمەندانیان ڕاسپاردووە، بۆ ئەوەی تاوەکو کاتژمێر 12:00ـی شەو لە دەوام بمێننەوە و مووچە دابەش بکەن.