ڕێژەی سەوزایی لە هەرێمی كوردستان لە ستاندارد نزیک دەبێتەوە

ئاڤا نیوز

 

هەڵمەتی چاندنی نەمام بە ئامانجی زیادکردنی ڕێژەی سەوزایی لەهەرێمی كوردستان بەردەوامە، تاكۆتایی ئەمساڵ زیاتر لە 100 هەزار نەمام لەهەولێر دەچێنرێت.

 

وێنە گەورەکە: لە ماوەی مانگی سێیی ئەمساڵ 50 هەزار دار و گوڵ، لە سنووری پارێزگای هەولێر چێنراون، تا کۆتایی ئەمساڵ بەگوێرەی وەرزەکان ڕێژەکەی بۆ 100 هەزار نەمام بەرز دەکرێتەوە.

 

بۆچی گرنگە: ڕێژەی سەوزایی لە هەرێمی کوردستان گەیشتووەتە %20، ئامانجەکە ئەوەیە ڕێژەی سەوزایی بگاتە ستاندارد و لە %30  نزیک ببێتەوە.

 

لێدوانی فەرمی: "بە گوێرەی پلانێک 10 هەزار داری سنەوبەر لە شەقامی 100 مەتری، سنووری شارەوانی شەش، پارکی هەوار و گەڕەکی هەولێری نوێ دەچێنرێن و هەڵمەتی چاندنی نەمام لە سنووری پارێزگای هەولێر و دەورووبەری بەردەوام دەبێت."ڕێببین ئەحمەد، بەڕێوەبەری ئەندازەی پارکەکانی هەولێر وای بە ئاڤا نیوز گوت.

 

زانیاریی زیاتر: ئەو دارانەی دەچێنرێن بریتین لە سنەوبەر، داری حەواس، سەردی عەمودی، داری سیسەم برەخت و تەتۆنیا.

 

باکگراوند: لە نەمامگەکانی هەولێر ساڵانە 100 هەزار دار  و زیاتر لە 150 هەزار گوڵ بەرهەمدەهێنرێن، %75 ی ئەو دار و گوڵانە لە هەولێر دەچێنرێن بەشەکەی دیکە بۆ قەزاکانی دەورووبەر و ئیدارەی سەربەخۆی سۆران دەنێردرێت.