کۆشکی سپی: دڵمان بۆ کوژرانی کرێکارانی بیانی لە غەززە دێشێت

ئاڤا نیوز

 

کۆشکی سپی دڵتەنگی قوڵی خۆی دەربڕی بەرامبەر کوژرانی ژمارەیەک کرێکاری خۆبەخشی بیانی ڕێکخراوی "وۆرڵد سێنتراڵ کیتچن" لە هێرشێکی ئیسرائیل لە غەززە.

 

چیرۆکی سەرەکی: بەگوێرەی ڕاپۆرتی وەزارەتی تەندروستیی حەماس، ئێوارەی ڕۆژی دووشەممە ئیسرائیل ئۆتۆمبێلی چوار کارمەندی فریاگوزاری بیانی "وۆرڵد سنتراڵ کیتچن"ـی کردە ئامانج، هەر چوار کارمەندەکە لەگەڵ شۆفێرە فەڵەستینیەکەیان کوژران.

 

لێدوانی فەرمی: ئادرین واتسۆن، گوتەبێژی ئەنجوومەنی ئاسایشی نەتەوەیی ئەمریکا لە پلاتفۆرمی ئێکس نووسیویەتی: دڵمان شکاوە و بەقووڵی ناڕەحەت بووین بەهۆی ئەو هێرشەی ئیسرائیل کە بووە هۆی گیانلەدەستدانی کرێکارانی"وۆرڵد سنتراڵ کیتچن" لە غەززە.

 

پێدراوە ڕاستەکان: ئەو چوار کوژراوە بیانین، (سێ) کەسیان هەڵگری وڵاتینامەی بەریتانی و ئوسترالی و پۆڵەندین، ئەوەی چوارەمیش ناسنامەی دیارنییە، هەروەها شۆفێرەکە، ناوی سەیف عیسام ئەبو تەهایە، فەڵەستینییە و وەک وەرگێڕێک لەگەڵییان بووە.

 

ئەمەش بزانە: ئەمریکا داوای لە ئیسرائیل کردووە بە خێرایی لێکۆڵینەوە بۆ ڕووداوەکە بکات.