دادگەی فیدراڵی دادبینی بۆ سکاڵایەکی تایبەت بە کشانەوەی هێزەکانی ئەمریکا دەکات

ئاڤا نیوز 

 

ئەندامێکی ئەنجوومەنی نوێنەرانی عێراق داوا دەکات، دادگەی فیدراڵی ڕێککەوتننامەی ئەمنی نێوان عێراق و ئەمریکا هەڵبوەشێنێتەوە.

 

چیرۆکی سەرەکی: باسم خەشان، ئەندامی ئەنجوومەنی نوێنەرانی عێراق، سکاڵای لەسەر سەرۆککۆمار و سەرۆکوەزیرانی عێراق تۆمارکردووە، داوا دەکات کۆتایی بە ئەرکی هێزەکانی ئەمریکا لە عێراق بهێنێت و ئەمریکا قەرەبووی ئەو ناوچانە بکاتەوە کە لەدوای جێهێشتنیان لەلایەن هێزەکانی ئەمریکا لە ساڵی 2009 زیانیان بەرکەوتووە.

  
ئەوەی پێشبینی دەکرێت: چاوەڕوان دەکرێت کۆبوونەوەی سوودانی لەگەڵ بایدن لە ناوەڕاستی ئەم مانگە ببێتە گەڕی چوارەمی دانیشتنی نێوان ئەمریکا و عێراق سەبارەت بە ڕێککەوتننامەی نێوانیان. 

 

لێدوانی فەرمی: "بەرپرسانی باڵای عێراق لەگەڵ چوونەدەرەوەی هێزەکانی ئەمریکا لە عێراق نین، چونکە بە نەمانی ئەمریکا لە عێراق مەترسی دووبارە سەرهەڵدانەوەی داعش هەیە، جگە لەوەی کاریگەریی نەرێنی دەخاتە سەر ئابووری عێراق و ئابوورییەکەی دادەڕمێت."

کارۆخ خۆشناو، سەرۆکی ئنستیوتی توێژینەوەی ئەمریکی_کوردی وای بە ئاڤا نیوز گوت.

 

باکگراوند: ڕێککەوتننامەی ئەمنی نێوان ئەمریکا و عێراق ساڵی 2008 واژۆکراوەو بەپێی ڕێککەوتننامەکە ساڵی 2009 هێزەکانی ئەمریکا لە شار و شارۆچکەکان دەکشێنەوە، بەڵام لە ساڵی 2014 دوای هێرشی داعش بۆ سەر عێراق، جارێکی دیکە هێزەکانی ئەمریکا گەڕانەوە وڵاتەکە.