دوای ئاشکراکردنی نهێنی لەسەر دادگەی فیدراڵی سکاڵا دژی مەشعان جبووری تۆمار دەکرێت

ئاڤا نیوز

 

دوای ئەوەی مەشعان جبووری ڕایگەیاند لەلایەن سەرۆکی دادگەی فیدراڵییەوە هەڕەشەی لێکراوە و چەند نهێنییەکی لەسەر دادگەکە ئاشکرا کرد، ئەندامێکی ئەنجوومەنی نوێنەرانی عێراق سکاڵای لەسەر ناوبراو تۆمار کرد.

 

وێنە گەورەکە: لە ماوەی ڕابردوودا چەندین جار تۆمەت ئاراستەی دادگەی فیدراڵی کراوە، کە دادگەیەکە بۆ مەبەستی سیاسی بەکار دەهێنرێت و لایەنگیری دەکات.

 

چی ڕوویدا؟ مەشعان جبووری، یەکێک لە سیاسییە دیارەکانی سوننەیە لە عێراق، لە بەرنامەیەکی تەلەڤزیۆنیدا ڕایگەیاند، جاسم محەممەد عەبوود، سەرۆکی دادگەی فیدراڵی پێی گوتووە ئەگەر لە هاوپەیمانییە سێقۆڵییەکەی پارتی، سەدر و سیادە نەکشێیتەوە، ئەندامیێتیت لە ئەنجوومەنی نوێنەرانی عێراق هەڵدەوەشێنمەوە.

 

لێدوانی فەرمی: عالیە نوسەیف، ئەندامی ئەنجوومەنی نوێنەرانی عێراق لە هاوپەیمانیی دەوڵەتی یاسا ڕایگەیاند: "مەشعان جبووری هەڕەشەی لە سەرۆکی ئەنجوومەنی باڵای دادوەری و دادگەی فیدراڵی کردووە، بۆیەم سکاڵام تۆمار کردووە".

 

زانیاریی زیاتر: لە مانگی ئایاری 2022 دادگەی فیدراڵی، ئەندامێتیی مەشعان جبووری لە ئەنجوومەنی نوێنەرانی عێراق هەڵوەشاندەوە، بە تۆمەتی ساختەکردنی بڕوانامەی "بەکالۆریۆس" لە سووریا.