تۆمەتباری کوشتنی هیشام هاشمی ئازادکرا

ئاڤا نیوز

 

سەرباری ئەوەی دادگە بڕیاری لە سێدارەدانی بۆ بکوژی هیشام هاشمی شرۆڤەکاری ئەمنی دەرکرد، بەڵام چەند سەرچاوەیەکی عێراقی دەڵێن ئازادکراوە.

 

چیرۆکی سەرەکی: شەوی شەشی تەممووزی 2020، هیشام هاشمی، شرۆڤەکاری سیاسی و ئەمنیی عێراقی لەبەردەم ماڵەکەی خۆی لەبەغدا لەلایەن ژمارەیەک چەکداری دەمامکدارەوە تەقەی لێکرا و کوژرا. دوای ساڵێک لە کوژرانی، مستەفا کازمی، سەرۆکوەزیرانی ئەو کاتی عێراق دەستگیرکردنی بکوژانی هاشمی ڕاگەیاند.

 

ئەوەی لەو بارەیەوە دەگوترێت: ڕۆژنامەی عەرەبی ئەلجەدید، لەزاری چەند سەرچاوەیەکی عێراقیەوە دەڵێت: سەرباری ئەوەی دادگە لە ئایاری ڕابردوو بڕیاری لە سێدارەدانی بۆ بکوژی هیشام هاشمی دەرکردبوو، بەڵام تۆمەتبارەکە ئازادکراوە.

 

زانیاریی بەدەستهاتوو: دوای ئەوەی تانە لە بڕیارەکەی دادگە دراوە، جارێکی دیکە لێکۆڵینەوە لە دۆسیەکەدا کراوە، دواتر بێتاوانی تۆمەتبارەکە سەلمێنراوە و ئازادکراوە. 

 

ئەوەی پێویستە بیزانیت: پێش دەرچوونی بڕیاری لەسێدارەدانی ئەحمەد حەمداوی عوێد، 10 جار دانیشتنی دادگەییکردنەکەی دواخرا، هاوکات تۆمەتبار کرا بەوەی پەیوەندی بە کەتائیبی حیزبوڵڵای عێراقەوە هەیە.

 

 ئەمەش بزانە: ماوەی چەند مانگێکە کەسووکاری هیشام هاشمی لە ترسی هەڕەشەی گرووپە چەکدارەکان کە بەزۆر سکاڵاکەیان پێبکشێننەوە لە دەرەوەی عێراق دەژین. 

 

 ئەوەی ئێستا ڕوودەدەات: تۆمەتبارەکە، ئیستا لە دەرەوەی عێراقە و هەندێک کەس دەیانەوێت بیگەڕێننەوە سەر کارەکەی خۆی بە پلەی ملازم لە وەزارەتی ناوخۆی عێراق.