پەیامێک لە حکومەتەوە لەبارەی مووچە: سووکایەتی و جیاکاری قبووڵ ناکەین

ئاڤا نیوز

گوتەبێژی حکومەت پەیامێک لەبارەی مووچە بڵاودەکاتەوە و ڕایدەگەیێنێت،  نە سووکایەتی قبووڵ دەکەن و نە جیاکاری لە نێوان مووچەخۆراندا دەکەن. دڵنیاییش دەدات لەوەی سەرۆکوەزیران بارزانی سەرقاڵی چارەسەرکردنی کێشەکەیە.

وێنە گەورەکە: لەکاتێکدا 18 رۆژ بەسەر مانگی سێدا تێپەڕیوە، حکومەتی عێراق هێشتا مووچەی تەواوی مووچەخۆرانی هه‌رێمی كوردستانی نەناردووە و  ئامادەنییە مووچەی کەسوکاری شەهیدان، هەرسێ سەرۆکایەتییەکە، پێشمەرگە و هێزە ئەمنی و سەربازییەکان بنێرێت کە ژمارەیان زیاتر لە 320 هەزار مووچەخۆرە.

پەیامی فەرمی: پێشەوا هەورامانی، گوتەبێژی حکومەتی هەرێمی کوردستان ئەمشەو پەیامێکی بڵاوکردوەوە و ڕایگەیاند: "داکۆکی لە سەرجەم مافەکانی خەڵک دەکەین، پێشێلکردنی مافە دەستوورییەکانمان و جیاکاری و سیاسەتی برسیکردن بە هەموو شێوەیەک ڕەتدەکەینەوە و دژی دەوەستین".

چیرۆکی سەرەکی: وەک گوتەبێژی حکومەت ڕوونیکردووەتەوە، سەرەتای دروستبوونی کێشەکە لەوە دەستیپێکردووە؛ "لایەنێکی سەرەکی و پێکهێنەری حکومەت دوای لایەنێکی ئۆپۆزیسیۆن کەوتووە و ڕێنیشاندەری ناحەزان بووە بۆ دروستکردنی فشار بۆ بڕینی مووچە".

ئێستا چی ڕوودەدات: وەزارەتی دارایی حکومەتی فیدراڵ ئامادەیە تەنها 59%ی مووچە بدات، ئەویش دوای یەک مانگ لە دواخستنی، "ئەمەش بۆ دروستکردنی فیتنە و جیاکاری و سووکایەتییە بە فەرمانبەرانی هەرێمی کوردستان".

چارەسەر: حکومەتی هەرێمی کوردستان و بەتایبەت سەرۆکوەزیران سەرقاڵی چارەسەرکردنی کێشەی مووچەی سەرجەم مووچەخۆرانە. 

گۆشەیەکی دیکە: گوتەبێژی حکومەت دەستپێشخەری دەکات بۆ "ئەوانەی لە دەرەوەی نیەتی نیشتیمانی و پاراستنی قەوارەی دەستووری هەرێمی کوردستان موزایەدە و قسەی دیکە دەکەن، ئەگەر ڕاست دەکەن با بفەرموون لەگەڵ وەزارەتی دارایی عێراق ئەو بڕە مووچەیە خۆیان دابەشی بکەن".

باکگراوند: هەرێمی کوردستان بۆ مووچە پێویستی به‌ 949 ملیار دیناره‌، بەڵام تەنیا 560 ملیار دینار نێردراوە و 389 ملیار دینار كورتهێنان هه‌یه‌، تواناشی نییە بە داهاتی ناوخۆ کورتهێنان پڕبکاتەوە، بۆیە تاوەکو ئێستا دەستی بە دابەشکردنی مووچە نەکردووە.