بەهۆی تەقینەوەی مین 16 کەس لە سووریا گیانیان لە دەست دا

ئاڤا نیوز

لە بیابانی باکووری سووریا مین بە ئۆتۆمبێلێکدا تەقیوەتەوە کە چوون بۆ کۆکردنەوەی دوومەڵان و بەهۆیەوە 16 کەس مروون.

لێدوانی فەرمی: ڕووانگەی سووری بۆ مافەکانی مرۆڤ ڕایگەیاند: مینێکی چێنراوی داعش لە پارێزگای ڕەققە بە ئۆتۆمبێلێکدا تەقیوەتەوە کە 20 کەسی مەدەنی تێدا بووە، بەهۆیەوە 16 یان گیانیان لە دەست داوە.

زانیاریی زیاتر: نۆ لەو کەسانەی گیانیان لە دەست داوە ژن بوون، چوارەکەی تریش بە سەختی بریندارن. ئەم کەسانە چوون بۆ کۆکردنەوەی دوومەڵان.

ئەمەش بزانە: دوومەڵان خواردنێکی گرانبەهایە، دوومەڵانی بیابانی سووریاش یەکێکە لە باشترین دوومەڵانەکانی جیهان و بەناوبانگە، بەڵام بەهۆی ڕێکخراوی داعش کۆکردنەوەی قورس و مەترسیدار بووە.

باکگراوند: کۆتایی مانگی ڕابردوو 14 کەس لەکاتێکدا سەرقاڵی کۆکردنەوەی دوومەڵان بوون بەهۆی تەقینەوەی مینێکی داعش لە ڕەققە گیانیان لە دەست دا، چەند ڕۆژێک دواتر بەهۆی هێرشێکی چەکدارانی داعش دەیان کەس کوژران و بریندار بوون.