وەزیری دارایی عێراق: ئەو مووچەخۆرانەی کارتی بانکییان نییە دەتوانن بە کاش مووچە وەرگرن

ئاڤا نیوز

 

وەزیری دارایی عێراق دەڵێت، بۆ مانگی ئادار، ئەو مووچەخۆرانەی کارتی بانکییان نییە دەتوانن بە کاش مووچە وەربگرن، بەڵام پێویستە بۆ مانگی نیسان هەمووی کارتی بانکی هەبێت. 

 

وێنە گەورەکە: ڕۆژی چوارشەممە 13-03-2024 تەیف سامی، وەزیری دارایی عێراق لەلایەن لیژنەی دارایی ئەنجوومەنی نوێنەرانی عێراق بانگهێشتکرا و کۆبوونەوە.

 

لێدوانی فەرمی: "وەزیری دارایی عێراق پێی گوتین بۆ مووچەی مانگی ئادار دەکرێت ئەو مووچەخۆرانەی کارتی بانکیان نییە، بە کاش مووچە وەرگرن، بەڵام بۆ مانگی نیسان دەبێت هەمووی کارتی بانکی هەبێت."

موعین کازمی، ئەندامی لیژنەی دارایی لە ئەنجوومەنی نوێنەرانی عێراق لە کۆنگرەیەکی ڕۆژنامەوانیدا وایگوت.

 

لەلایەكی دیكەوە: د.نەرمین مەعرووف، جێگری سەرۆکی لیژنەی دارایی لەئەنجوومەنی نوێنەرانی عێراق بۆ ئاڤا نیوز گوتی: "وەزارەتی دارایی عێراق، بەهۆی بایۆمەترییەوە زانیاریی لەسەر هێزە ئەمنییەکانی هەرێمی کوردستان هەیە، وەزیری دارایی پێی گوتین هەرکاتێک لیستەکەیان نێردرا پارەکە خەرج دەکەین."

 

ئەمەش بزانە: شەوی ڕابردوو دادگەی فیدراڵی عێراق، لە ڕاگەیێنراوێکدا ئاماژەی بەوە دا، کە دەبێت تاوەکو هەژماری فەرمانبەران تەواو دەبێت، وەزارەتی دارایی عێراق بە كاش پارەی مووچەی فەرمانبەران خەرج بکات.