ئەعرەجی: سەرۆک بارزانی ڕایسپاردم بۆ پشکنینی هەر شوێنێک کە گومانی بوونی مۆسادی لێ دەکرێت

ئاڤا نیوز

 

ڕاوێژکاری ئاسایشی نەتەوەیی عێراق ئاشکرای دەکات دوای بۆردوومانکەی ئێران بۆ سەر هەولێر سەرۆک بارزانی ڕایسپاردووە بۆ پشکنینی هەر شوێنێک کە گومانی بوونی مۆسادی لێ دەکرێت. 

 

بۆچی گرنگە: پاساوی ئێران بۆ بۆردوومانکردنی هەولێر "بوونی بارەگای مۆساد" بوو؛ ڕاسپاردنی ڕاوێژکاری ئاسایشی نەتەوەیی عێراق ئەو دەنگۆیانە ڕەتدەکاتەوە.

 

لێدوانی فەرمی: قاسم ئەعرەجی، ڕاوێژکاری ئاسایشی نەتەوەیی عێراق لە چاوپێکەوتنێکدا تەلەڤزیۆنیدا سەبارەت بە بۆردوومانەکەی ئێران بۆ سەر هەولێر ئەمانەی گوت:

• ئەو میوانەی لە ماڵی پیشڕەو دزەیی بوو و بە مووشەکبارانی ئێران گیانی لەدەست دا هاوڵاتییەکی مەسیحی عێراقی بوو.

• سەرۆک بارزانی ڕایسپاردم بە پشکنینی هەر شوێنێک لە هەرێمی کوردستان کە گومانی بوونی مۆسادی لێ دەکرێت.

• ئێرانییەکان لەسەر بارەگا چۆڵکراوەکانی حیزبەکانی ڕۆژهەڵاتی کوردستان لە هەرێمی کوردستان گفتوگۆیان لەگەڵ کردین.

• ئێرانییەکان زانیارییان پێداین کە کەسایەتیە ئۆپۆزسیۆنەکانی تاران پاسپۆرتی عێراقییان هەیە.

• ئەنجامی لێکۆڵینەوەکان لە بۆردوومانەکەی ئێران بۆ سەر هەولێر پێشکەشی سوودانی کرا.

• هەماهەنگیی باڵامان لەگەڵ هەرێمی کوردستان هەیە.

 

وێنە گەورەکە: درەنگانی شەوی 15-01-2024، سوپای پاسدارانی ئێران بە مووشەک هێرشی کردە سەر ماڵی گەورە سەرمایەدارێکی شاری هەولێر، بەهۆیەوە پێشڕەو دزەیی، ژینا کچە تەمەن 11 مانگەکەی، سەرمایەدارێکی هاوڕێی و کارگوزارێکی فلیپینی گیانیان لەدەست دا؛ شەش کەسی دیکەش بریندار بوون کە ئەندامانی خێزانەکەی و کارگوزارەکانی بوون.