عێراق لە بواری سووتەمەنی ڕێککەوتنێکی نوێ لەگەڵ ئێران دەکات

ئاڤا نیوز

 

عێراق بۆ هاوردەکردنی گازی سروشتی دانوستانی لەگەڵ ئێران دەستپێکردووە، بڕیارە لە بەرامبەر هاوردەکردنی گاز، نەوتی ڕەشی پێبدات. 

 

ئەوەی پێویستە بیزانیت: عێراق و ئێران دانوستان دەکەن بۆ ئەوەی هێڵی ئێران بەکاربهێنن بۆ گواستنەوەی گازی تورکمانستان بۆ عێراق، تارانیش ئێستا هەڵسەنگاندن بۆ پرسەکە دەکات و وەڵامیان دەداتەوە، ئەگەر ڕازی بێت، عێراق لە هاوینی داهاتوو پشت بە گازی تورکمانستان دەبەستێت.

لێدوانی فەرمی: زیاد عەلی فازل، وەزیری کارەبای عێراق ڕایگەیاند، سەردانی تورکمانستانیان کردووە بۆ واژۆکردنی ڕێککەوتننامەیەک بەمەبەستی هاوردەکردنی 20 ملیۆن مەتر چوارگۆشە، تاکە ئاڵنگاری بەردەمیشیان نەبوونی هێڵێکی گواستنەوەیە بۆ گازەکە لە تورکمانستانەوە بۆ عێراق.

 

زانیاریی زیاتر: ماوەی چەند ساڵێکە ڕێککەوتن لەگەڵ ئێران کراوە بۆ ڕۆژانە هاوردەکردنی 51 ملیۆن مەتر چوارگۆشەی گازی سرووشتی، ئەوەش پێویستی عێراق پڕدەکاتەوە، بەڵام ئەگەر هاوردەکردنی گازی ئێران کەمی کرد، ئەوکات دەتوانن پشت بە 20 ملیۆن مەتر چوارگۆشەی تورکمانستان ببەستن. 

لەلایەکی دیکەوە: بەهەمانشێوە لەگەڵ قەتەر دانوستان بۆ هاوردەکردنی گازی شل هەیە، لە ڕێگەی کەشتییەوە دەگوازرێتەوە بۆ عێراق، 6 هەزار مێگاواتی کارەبای عێراق لە گازی هاوردەکراو بەرهەم دەهێنرێت.