ڕەشەکوژیی کوردانی فەیلی؛ شەهیدانی گۆڕگوم و ئازارێکی بێ کۆتایی

 

لە گۆشەیەکی تاریک و پەردەپۆشکراوی مێژووی ئەم میللەتی کوردەدا... ڕەشەکوژیی کوردانی فەیلی تاوانێک بوو بە بەرچاوی دونیاوە ئەنجامدرا، هاوارێک بوو مرۆڤایەتی لەئاستیدا کەڕولاڵ و بێ هەڵوێست بوو، بەڵام وەک نەقشی سەر بەرد لە سەر لەوحی ویژدانی هەموو کوردێک هەڵکۆڵراوە، برینێکە دەیان ساڵە خوێنی لێ دەچۆڕێ، بێ دەرمان و بێ خاوەن و نوقمی نا دادپەروەریە. لە ساڵانی حەفتاو هەشتای سەدەی ڕابردوو ڕژێمی بەعسی عرووبی، بە بڕیارگەلێکی قەرەقوشیانەی فاشستیانە، ڕەگەزنامەی لە نیو ملیۆن کوردی فەیلی سەندەوە، ماڵ و حاڵ وکارو کاسبی و سەروەت و سامان و خاک وئاویانی بۆ چەتەوڵ و کوردکوژەکانی بەعس حەڵالکرد! ژین و ژیواری لێ تاڵکردن .. رۆژی رووناکی لێ تارکردن ، خەون و خەیاڵ و ئاسوودەیی زەوتکردن .. بوون و نەبوونی بە کابوسێکی قورسی بێکۆتایی کردن. دەیان هەزار بنەماڵەی کوردی فەیلی  لە سەرەتاییترین مافەکانیان بێ بەش کران، لەناو پێخەف و لەسەر خوانی ئیوارانیان،ب ە جلی ناوماڵ و لەسەر دووکان و لەناو بازاڕو لە خوێندنگە و لە زانکۆکانەوە پەلبەستکران.. بە زۆرەملێ و لەژێر هەڕەشەی لوولەی چەکی عروبەدا، بە ڕووتوڕەجاڵی، بەنیوەی شەوان، لەژێر باڵی قورسی تاریکییدا، ئاوارەی سەر سنووری ئێران کران. دەیان هەزار گەنجیان بەتۆمەتی (مەترسین بۆ سەر ئاسایشی عێراق)  پەلکێشی زیندانە دۆزەخئاساکانی بەعس کران. دایكانی سەرو پرچ سپی دەگریان و دەپاڕانەوە: وەرن ڕوحمان بکێشن، بەڵام توخوا با بۆ دواجار بۆنی لاملی کوڕەکانمان بکەینەوە !. برا چاوڕەشەکان بەو پەڕی بێ ئەخلاقییەوە پێیان دەگوتن: وەرن هینمان بۆن بکەن! بە باوکە ڕیش چەرمووە پشت کووڕەکانیان دەگوت: ئێوە بڕۆن خەمتان نەبێت سبەی کوڕەکانیشتان دەگەنە لاتان .. ئیتر هەر ئەو درۆیە بوو، لەزیندانەوە ڕاپێچی قەسابخانەکانی عروبە کران. نە ئەوساو نە ئێستا، بۆ تا هەتایش هەزاران گەنجی کوردی فەیلی شوێنبزر کران و نەگەڕانەوە!. دەیان ساڵ بوو بێ سەروشوێن و بێ شوێنەوار بوون. تا لە وەرزێکی بەهاری وەک ئەمساڵدا، گوڵاڵەسوورە دەشت ودەرو سەحرای عێراقی تەنی ئەوسا زانیمان ئەوە خوێنی ئاڵی بە ناهەق ڕژاوی، جەستەی ئەشکەنجەدراوی، بە نامەردانە نێژراروی دەیان هەزار (سەردار خانەقینی و سەلیم کاکە حەمە و هەردی ، کاوان ، لوقمان ،هاوڕێ و دڵشاد _ فەیلییە ).. ئەوە خوێنی پاکژی ( شیرین و لەیلاو ئاوازو رۆژین و نەسرین – فەیلییە !) وا ئاسۆی کوردی ڕەنگین کردووە!

بیست و دوو ساڵە ڕژێمی بەعس بە ڕسوایی لەنێوچووە، کەچی هێشتا میراتگرە حازرخۆرەکانی ئامادەنین و ڕێگرن لە بەدیهێنانی دادپەروەری و خەریکن ئەو مێژووە بشێوێنن. نە گشت جەللادەکان دادگایی کران، نە مافی ڕەوای خاوەن ماف گەڕێنرایەوە، نە دۆسیەکانی بێسەروشوێنان یەکلاییکرانەوە.

ئەمڕۆش کە یادی ئەو تاوانە قێزەونە دەکەینەوە، پێویستە بڵێین: ئیدی ڕەشەکوژیی کوردانی فەیلی  بازنەو تەوقی ڕووداوێکی سیاسیی ماوەبەسەرچووی شکاندووەو بۆتە ژانێکی قووڵ لە ویژدانی مرۆڤایەتیدا . ئەمڕۆ نەوەیەکی نوێی کوردی فەیلی لە ئارادان و ڕووی دەمی نیگەرانی و دادوبێدادیان لە دەوڵەتی بەناو فیدراڵی عێراق و هەموو جیهانی عەرەبی و ئیسلامییە و دەپرسن : بۆچی و بە چ هۆکارو تاوانێک باوباپیرانمان، مام و خاڵوان و نەنک و پوورو دایک و باوک و خوشک و برای کوردانی فەیلی ڕەشبگیرو ڕەشەکوژی و ئاوارەو دەربەدەرکران؟ دەیان هەزار شەهیدمان لە کوێ نێژراون؟ بۆچی گۆڕگومن؟، بە چ شەرع و یاسایەکی ئاسمانی و مرۆیی مافی ژیان لە دەیان هەزار مرۆڤی کوردی فەیلی سەندراوەتەوە {وإذا الموءودة سئلت بأي ذنب قتلت} !

ڕەشەکوژیی کوردانی فەیلی تەنیا لاپەڕەیەکی تاریکی تۆماری  مێژوومان نیەو بەس، بەڵکو بانگەوازی ویژدانێکی زامدارو شکۆی بەئاگای ئینسانی کوردی غەدرلێکراوی ئەم خۆرهەڵاتی ناوەڕاستەیە کە سەدان ساڵە خۆری لێ هەڵنەهاتووەو لەناوەڕاستی دۆزەخێکی پڕ داگیرکاری و نادادپەروەری و خوێنڕیژیشدایە!. بانگەوازێکی یەک دەنگی و فرە ئاوازو فرە زمانیی هەموو گەلانە: “ ئیتر با بەس بێ !”. کەرامەت بۆ مرۆڤ بگەڕێننەوەو ستەم لەسەر میللەتان هەڵگرن.

بێ دانپێدانان دادپەروەری بوونی نییە. ئاشتەواییش بێ دادپەروەری واتای نییە. وڵاتێکیش بناغەکەی نادادپەروەری و ستەم بێت، ڕابردووی خوێناوییەو ئێستای نائارامییە و داهاتوییشی تاریک و کاولکارییە.