ئەرمینیا بیر لە چوونە نێو یەکێتیی ئەوروپا دەکاتەوە

ئاڤا نیوز

وەزیری دەرەوەی ئەرمینیا دەڵێت وڵاتەکەی بیر لەوە دەکاتەوە ببێتە ئەندامی یەکێتیی ئەوروپا، بۆ ئەوەی لە ئەگەری هەڵکشانی گرژییەکانیان لەگەڵ ڕووسیادا پەیوەندیی پتەوتریان لەگەڵ ڕۆژئاوادا هەبێت.


وێنە گەورەکە: لە ڕاپەڕینی ساڵی 2018 ەوە کە نیکۆل پاشنیان بووەتە سەرۆکوەزیرانی ئەرمینیا، پەیوەندییەکانی وڵاتەکەی لەگەڵ ئەوروپا و ئەمریکادا پتەوتر کردووە، ئەمەش چەندینجار ڕووسیای هاوپەیمانە کۆنەکەی تووڕە کردووە.

لێدوانی فەرمی: ئارارات میرزۆیان، وەزیری دەرەوەی ئەرمینیا  لە چاوپێکەوتنێکدا لەگەڵ کەناڵی تەرەتەی تورکیدا ڕایگەیاندووە: "ئێستا زۆر دەرفەتی نوێ لە ئەرمینیا تاوتوێ دەکرێن، بۆیە نهێنی نییە گەر بڵێم یەکێک لەوانە ئەوەیە ببینە ئەندامی یەکێتیی ئەوروپا".

گۆشەیەکی دیکە: ئەرمینیا چەندینجار ڕایگەیاندووە هاوپەیمانێتییەکەی لەگەڵ ڕووسیادا نابێتە هۆی بەشداریکردنی لە شەڕی ئۆکرانیادا.

هۆکارە زانراوەکان: ئەرمینیا چەندجارێک ڕووسیای بەوە تۆمەتبار کردووە هەوڵدەدات حکومەتی وڵاتەکەی لاواز بکات. نیگەرانە لەوەش لە دژی ئازەربایجانی کۆنەنەیاریدا بەرگریی لە ئەرمەنستان نەکردووە، بەپێچەوانەوە لە ساڵانی ڕابردوودا باکۆ لە مۆسکۆ نزیکتر بووەتەوە.