هەڵوێستی سووریا لەبارەی کاراکردنەوەی بۆری نەوتی عێراق بۆ دەریای ناوەڕاست

ئاڤا نیوز

 

وەزارەتی نەوتی سووریا ئەگەری کاراکردنەوەی بۆری بانیاس بۆ گواستنەوەی نەوتی عێراق بۆ دەریای ناوەڕاست ئاشکرا دەکات و ئاماژە بۆ ئەوە دەکات هێشتا ئەو پرسە چارەسەر نەکراوە.

 

وێنە گەورەکە: بۆری کەرکووک – بانیاس لەنێوان عێراق و سووریا، لە مانگی نیسانی ساڵی 1952 کەوتە کار و لە مانگی تشرینی دووەمی هەمان ساڵ بەفەرمی کرایەوە، کە لە ڕێگەیەوە نەوتی کێڵگە نەوتییەکانی کەرکووکی دەگواستەوە بەندەری بانیاس لە سووریا.

 

لێدوانی فەرمی: ئەحمەد سلێمان، بەڕێوەبەری پەیوەندییە گشتییەکان لە وەزارەتی نەوت و سامانە کانزاییەکانی سووریا ڕایگەیاند، هیچ دانووستاندنێک نییە بۆ هاوردەکردنی نەوت لە عێراق و سعوودیەوە، بەڵکو وەزارەتی نەوت، نەوتی خاو هاوردە دەکات بە ڕاگەیاندنی تەندەر بۆ بەدەستهێنانی باشترین بژاردە بۆ دەستەبەرکردنی دابینکردنی متمانەپێکراو لەچوارچێوەی مەرجەکانی گرێبەستدا.

 

زانیاریی زیاتر: ئەحمەد سلێمان، ڕوونیشیکردەوە، وەزارەتەکەیان تەندەرەکانی بۆ دابینکردنی نەوتی خاوی سووک و قورس و بەرهەمە نەوتییەکانی وەکو بەنزین، گازوایل، نەوتی سپی و غازی ماڵان ڕاگەیاند، گرێبەستییەکانیش لەگەڵ ئەو کۆمپانیایانەی تەندەرەکانیان بردەوە، تەواو کرا.

لە لایەکی دیکەوە : سەبارەت بە ئایندەی بۆری نەوتی عێراق- سووریا و تا چەند کارا دەبێت بۆ هاوردەکردنی نەوتی خاو و کارپێکردنی پاڵاوگە لەکار وەستاوەکان، ئەحمەد سلێمان ڕایگەیاند: "هێڵی بۆریی عێراق- سووریا پێویستی بە نۆژەنکردنەوە هەیە و هێشتا ئەم بابەتە چارەسەر نەکراوە".