وەزیری سامانە سرووشتییەکان: زۆربەی کێشەکان لەبارەی نەوت لەگەڵ بەغدا چارەسەرکراون

ئاڤا نیوز

وەزیری سامانە سرووشتییەکان ڕایدەگەیێنێ، زۆربەی کێشەکان لەبارەی نەوت لەگەڵ بەغدا چارەسەر کراون و تەنیا هەناردەکردنەوەی ماوە. ئاماژەی بۆ ئەوەش کرد کێشەیان نییە نەوتی کوردستان لەڕێگەی سۆمۆ بفرۆشرێت، بە مەرجێک شایستە داراییەکانی هەرێمی کوردستان دابین بکرێن".

لێدوانی فەرمی: کەمال محەممەد، وەزیری سامانە سرووشتییەکانی هەرێمی کوردستان بە وەکالەت لە کۆنگرەیەکی ڕۆژنامەوانیدا لە دهۆک ڕایگەیاند: 80% ی بڕیارەکانی دادگەی پاریس لەبارەی نەوت لە بەرژەوەندیی هەرێمی کوردستان بوون.

زانیاریی زیاتر: لەبارەی کێشەکانی نێوان هەولێر و بەغدا کەمال محەممەد گوتی: "زۆرینەی کێشەکانی تایبەت بە نەوتی چارەسەرکراون بە تێچووی دەرهێنانیشەوە، بۆ هەناردەکردنەوەش ئامادەین".

گرنگترین قسەکانی وەزیری سامانە سرووشتییەکان:

- زۆربەی کێشەکانی لەبارەی نەوتی هەرێمی کوردستان لەگەڵ حکومەتی عێراق چارەسەرکراون، تەنها کێشەی هەناردەکردنەوەی نەوت ماوە.

- دووبارە هەناردەکردنەوەی نەوت پەیوەستە بە عێراق و ئێمە وەک هەرێمی کوردستان ئامادەین.

- کێشەمان نییە کۆمپانیای سۆمۆ نەوت بفرۆشێت و داهاتەکەی بچێتە گەنجینەی حکومەتی ناوەند، بەڵام دەبێت شایستە داراییەکانی هەرێمی کوردستان دابین بکرێن.

- ئیدارەدان، دەرهێنان، کۆگاکردن و گواستنەوە و فرۆشتنی نەوت لە پێنج بڕیارەکەی دادگەی پاریس بوون، تەنها فرۆشتنی نەوت لە دەسەڵاتی وەزارەتی نەوتی عێراقە، چوار لە دەسەڵاتەکەی دیکە لای حکومەتی هەرێمی کوردستانە.

- زیانی ڕاگرتنی نەوتی هەرێمی کوردستان مانگانە کەمتر نییە لە 800 ملیۆن دۆلار و عێراق زەرەرمەندە.

- لەبارەی تێچووی دەرهێنانی نەوتی هەرێمی کوردستان لەگەڵ حکومەتی عێراق گەیشتووینەتە ڕێککەوتن؛ بۆ دەرهێنانی هەر بەرمیلێک نەوت 20.61 هەزار دینار دەدرێتە کۆمپانیاکان کە پێشتر نزیکەی هەشت هەزار و 900 دینار بوو.

بۆچی گرنگە: بەهۆی دەرنەکردنی یاسای نەوت و گاز لە پەرلەمانی عێراق، پرسی نەوت یەکێک لە کێشە بەردەوامەکانی نێوان هەولێر و بەغدایە، ئەمەش کاریگەری ڕاستەوخۆی لەسەر ژیان و گوزەرانی مووچەخۆران و خەڵک هەیە، بەو پێیەی دابینکردنی بەشە بودجەی کوردستان و شایستە داراییەکانی پێوە بەستراوەتەوە.

باکگراوند: له‌ 25ی ئاداری 2023ـەوە بە بڕیاری دادگەی ناوبژیوانیی  پاریس هه‌نارده‌كردنی نه‌وتی هه‌رێمی كوردستان له‌ڕێگه‌ی به‌نده‌ری جه‌یهانی توركیا ڕاگیراوە.