وەزیری بەرگریی تورکیا: تواناکانی پەکەکە گەیشتوونەتە خاڵی کۆتایی

ئاڤا نیوز

وەزیری بەرگری تورکیا ڕایدەگەیێنێ، بەهۆی ئۆپەراسیۆنە بەردەوامەکانیان توانای جموجۆڵی گەریلاکانی پەکەکە گەیشتووەتە خاڵی کۆتایی.

لێدوانی فەرمی: یەشار گولەر، وەزیری بەرگریی تورکیا لە کۆبوونەوەیەکدا بە ژمارەیەک فەرماندەی سەربازیی وڵاتەکەی ڕاگەیاندووە، بەهۆی "ئۆپەراسیۆنە سەرکەوتووەکانیان دژی تیرۆر لە ناوەوە و دەرەوەی سنوور"، پەکەکە گورزێکی بەهێزی بەرکەوتووە و توانای جموجۆڵی گەریلاکانیان گەیشتووەتە خاڵی کۆتایی.

ئەوەی پێشبینی دەکرێت: وەزیری بەرگریی تورکیا جەختی کردووەتەوە لە داهاتوودا هیچ شوێنێک ناهێڵنەوە دەستیان پێنەگات یا لەبەرچاویان نەبێت، بۆ ئەوەی کۆنترۆڵی تەواوی ئەو شوێنانە بکەن کە پاشەکشەیان بە گەریلاکانی پەکەکە کردووە،لە هێرشەکانیش بەردەوام دەبن بۆ ئەوەی "بەیەکجاریی کۆتاییان پێبهێنن".

باکگراوند: پێشتر ئاڤا نیوز بڵاوی کردبووەوە، سوپای تورکیا بۆ ئۆپەراسیۆنێکی گەورە و شەڕێکی یەکلاکەرەوە لە خاکی هەرێمی کوردستان، لە هاوینی ئەمساڵدا دەستی بە ئامادەکاری کردووە و  هەولێر و بەغداشیان لەو ئۆپەراسیۆنە ئاگادارکردووەتەوە.