گەشتی ئاسمانیی نێوان هەولێر و ئامەد دەستپێدەكاتەوە

ئاڤا نیوز

شاندی ژووری بازرگانيی دیاربەكر سەردانی هەولێریان كرد، لەگەڵ ئومێد خۆشناو پارێزگاری هەولێر كۆبوونەوە، سەرۆكی ژووری بازرگانيی ئامەد دەڵێت "لەم مانگەدا گەشتە ئاسمانییەكانی نێوان هەولێر و دیاربەكر دەستپێدەكاتەوە".

لێدوانی فەرمی: محەمەد كایا، سەرۆكی ژووری بازرگانی ئامەد (دیاربەكر) بە ئاڤا نیوزی ڕاگەیاند: لەم مانگەدا گەشتە ئاسمانییەكانی نێوان هەولێر و دیاربەكر دەستپێدەكاتەوە.

 

لە لایەکی دیکەوە: عەبدولقادر ئیمام ئۆغلو وەزیری گواستنەوە و گەیاندنی تورکیا ڕایگەیاند: پلانمان هەیە لەم مانگەدا گەشتی ئاسمانیی دیاربەکر – هەولێر دەستپێبکاتەوە.

ئەوەی پێویستە بیزانیت: بڕیار وابوو لە مانگی نیسان گەشتە ئاسمانییەكانی  نێوان هەولێر- ئامەد دەستپێبكات، بەڵام بە گوتەی سەرۆكی ژووری بازرگانی دیاربەكر،  هەر لەم مانگەدا یەكەم  گەشتی ئاسمانیی نێوان هەولێر- دیاربەكر دەست پێبكەین.

 

بۆچی گرنگە: بەهۆی بڵاوبوونەوەی ڤایرۆسی کۆڤید-19، گەشتە ئاسمانییەکانی نێوان فڕۆکەخانەی نێودەوڵەتی هەولێر و فڕۆکەخانەی دیاربەکر ڕاگیرا.

 

باكگراوند: لە 16-2-2024، جەودەت یەڵماز، جێگری سەرۆککۆماری تورکیا لە دیاربەکر ڕایگەیاند: گەشتە ئاسمانییەکانی نێوان هەولێر و ئامەد دەستپێدەکەنەوە.