نزیکەی 10 هەزار فەرمانبەر بە گەندەڵی و نایاسایی پلەیان پێدراوە

ئاڤا نیوز

دوای بەدواداچوونێکی وردی ئاڤا میدیا دەرکەوتووە 10 هەزار فەرمانبەر بە گەندەڵی یان بە نایاسایی پلەیان پێدراوە. هاوکات لەگەڵ ڕێكخستنەوەی پلە وەزیفییەكان، ئەو فەرمانبەرانە پلەکانیان لێوەردەگیرێتەوە.

ئەوەی لەوبارەیەوە دەگوترێت: ناونیشانی وەزیفی لەنێوان فەرمانبەرانی هەرێمی كوردستان و حكومەتی فیدراڵی جیاوازییەكی ئەوتۆی نییە، تەنیا ئەو ناونیشانانەی هێشتا یاسای پێویستیان بۆ دەرنەكراوە، لیژنەیەكی هاوبەشی ڕاژەی گشتی بەیەكەوە كاردەكەن لەگەڵ بەغدا بۆ دەستنیشانكردنی جیاوازییەكان لە ناونیشانی وەزیفی و هاوتاكردنییان.

ئەم چەند ڕۆژە باس لە ئەوە دەكرێت كە لەگەڵ ڕێكخستنەوەی پلە وەزیفییەكان پلەی هەزاران فەرمانبەر كە بە زیادەوە پێیان دراوە وەردەگیرێتەوە، دەشڵێن هەزارانی دیكە پلەی وەزیفیان دەوەستێت و بەرز ناكرێتەوە.

لێدوانی فەرمی: سەرچاوەیەكی باڵا لە سەرۆكایەتیی ئەنجوومەنی وەزیرانی هەرێمی كوردستان بە ئاڤا میدیای ڕاگەیاند:

- هەر كەسێك پێشتر  بە نایاسایی و یاخود بە نەزانی پلەی پێدرابێت، ئێستا پلەكەی لێ وەرناگیرێتەوە، بەو پێیەی پێچەوانەی یاسایە و بنەمایەكی یاسایی هەیە كە دەڵێت "مافی بەدەستهاتوو، ناسەنرێتەوە".

- لە ماوەی ڕابردوو، پێداچوونەوە بە گشت پلە وەزیفییەكان كراوە، هەر وەزارەتێك لەڕێگەی لیژنەی تایبەتمەند و پسپۆڕی خۆی، پێداچوونەوەی بە دۆسیەی كەسی سەرجەم فەرمانبەران كرد، بۆ دڵنیابوونەوە لە دواهەمین بڕوانامەی بەدەستهاتووی فەرمانبەر و ئەو پلە و سەرمووچانەی وەریگرتووە تا چەند بنەمای یاسایی هەیە، لە ئەنجامدا 10 هەزار پلەی وەزیفی گۆڕانكاری بەسەردا هاتووە و پێشتر بە نایاسایی پلەیان وەرگرتووە و دەبووایە لێیان وەربگیرێتەوە، بەڵام ڕێكارەكانمان وەستاندووە، بەهۆی ئەوەی نزیكەی 10 ساڵە پلە بەرزكردنەوە وەستاوە، ئێستا ناكرێت پلەیان لێ وەربگیرێتەوە، چونكە ئەگەر پلە بەرزكردنەوە نەوەستابا ڕەنگە زۆربەیان بەو 10 ساڵە هەمان ئەو پلە وەزیفییەیان بەدەستهێنابا. 

- ئەمجارە مەبەستمانە لە چوارچێوەی گەڕاندنەوەی پلە بەرزكردنەوە ئەو ناونیشان و پلە وەزیفیانە ڕێكبخەینەوە، ئەوەش بە كۆی گشتی پرۆسەكە پێویستی بە دابینكردنی داراییە، چونکە 330 هەزار فەرمانبەر دەگرێتەوە، ئەگەر ئەمساڵ نەماتوانی ئەمە بكەین و بڕە پارەیەكی زیادە دابنێین لە بودجەی ئەمساڵی عێراق، ئەوە ناچارین ساڵی داهاتوو ئەو بڕە پارەیە تەرخان بكەین كە بۆ گەڕاندنەوەی پلە بەرزكردنەوە پێویستە.

ئەوەی پێویستە بیزانیت: نزیكەی 10 ساڵە پلەبەرزكردنەوەی فەرمانبەرانی هەرێمی كوردستان وەستاوە، هۆكاری سەرەكیی ئەمەش نەبوونی پارەی پێویستە، حكومەت دوو پلە بۆ سێ پلە قەرزاری فەرمانبەرانی شارستانییە، بەڵام پلە بەرزكردنەوەی سەربازی بەتەواوی دراوە و مافیان نەفەوتاوە.