چیرۆکی مەترسیداری بەکارهێنەر و بازرگانانی ماددەی هۆشبەر

ئاڤا نیوز

 ڕزگار کۆچەر، پەیامنێری ئاڤا نیوز، چیرۆکی سەیری پێیە و کۆمەڵێک قوربانی ماددە هۆشبەرەکانی دواندووە.

چیرۆکی سەرەکی: یەکێک لەو قوربانیانە کچێکی تەمەن 18 ساڵە و دەڵێت "لەگەڵ برادەرێکم گیرام ئەو منی فێرکرد، ئەوکاتەی فێربووم 15 ساڵ بووم".

بەدواداچوونی ئاڤا: ئەو کچە قسە بۆ ڕزگار کۆچەر دەکات و دەڵێت "بەهۆی ماددە هۆشبەرەکانەوە وازم لە قوتابخانە و ماڵەوە هێنا و ژیانی خۆم تێکدا، ماددەکەشم لە برادەرێکم دەکڕی، تووشی کێشەی گەورەبووم و گیرام، جارێکی دیکەش لەسەر بەکارهێنانی ماددەی هۆشبەر گیراوم".

لەلایەکی دیکەوە: کەسێکی دیکە کە بازرگانی ماددە هۆشبەرەکانە و شەش کیلۆ ماددەی هۆشبەری هێناوەتە هەرێمی کوردستان و دەستگیرکراوە، قسە بۆ ڕزگار کۆچەر دەکات و دەڵێت "من بە ئۆتۆمبێلی خۆم کاسبیم دەکرد، شەش کیلۆ کریستاڵم لە ئێرانەوە هێنایە هەرێمی کوردستان، لەبەرئەوەی پێویستم بە پارە بوو ئەوکارەم کرد".

لێدوانی فەرمی: ئەرکان بیبانی، ئەفسەر لە بەڕێوەبەرایەتی نەهێشتنی ماددە هۆشبەرەکان بە پەیامنێری ئاڤا نیوزی گوت: دەمانەوێت شادەمارەکانی هێنانی ماددەی هۆشبەر بۆ هەرێمی کوردستان وشک بکەین، بە نزیکەیی دابەشکردن و هاتنی ماددەی هۆشبەرمان بۆ هەرێمی کوردستان وشک کردووە، هیچ کێڵگەیەکیش نییە لە هەرێمی کوردستان ماددەی هۆشبەری تێدا بەرهەم بهێنرێت بەڵکو لەوڵاتانی دراوسێوە دێت.

"مانگی یەکی ساڵی 2024 بەڕێوەبەرایەتیمان 199 تۆمەتبارمان دەستگیرکردووە بە تۆمەتی بەکارهێنان و بازرگانیکردن بە ماددەی هۆشبەر، توانیومانە زۆربەی کات ئەو ماددە هۆشبەرانە دەست بەسەردا بگرین پێش ئەوەی بگەنە هەرێمی کوردستان". ئەرکان بیانی وای گوت.