سوودانی سەردانی شنگال دەكات

ئاڤا نیوز

بڕیارە لە چەند ڕۆژی داهاتوودا، محەممەد شیاع سوودانی سەرۆکوەزیرانی عێراق، سەردانی شنگال بکات و ژمارەیەک پرۆژەش ڕابگەیێنێت.

زانیاری بەدەستهاتوو: بڕیارە لە چەند ڕۆژی داهاتوودا محەممەد شیاع سوودانی، سەرۆکوزیرانی عێراق سەردانی پارێزگای نەینەوا بکات و لەو چوارچێوەیەشدا دەچێتە هەریەک لە قەزاکانی شنگال، بەعاج و ناحیەی ڕەبیعە.

زانیاريی زیاتر: لە سەردانەکەیدا بۆ پارێزگای نەینەوا سوودانی کۆمەڵێک پرۆژە ڕادەگەیێنێت، لە شنگالیش بەردی بناغە بۆ دروستکردنی گوندی نوێی کۆچۆ و ژمارەیەک پرۆژەی دیکە دادەنێت و لە ناحیەی ڕەبیعەش نەخۆشخانەی ئەو ناحیەیە دەکاتەوە.

ئەوەی پێویستە بیزانیت: ئەمە یەکەمجارە سوودانی سەردانی شنگال دەکات، لەو کاتەوەی بووەتە سەرۆکوەزیرانی عێراق و پێشتر لە ساڵی 2023 بڕیاردا سەردانی قەزاکە بکات بەڵام هەڵیوەشاندەوە.

بۆچی گرنگە: ساڵی 2014 داعش هێرشی کردە سەر شنگال و دەیان کومەڵکۆژی تێدا ئەنجامدا و وێرانەیەکی زۆری لەدوای خۆی جێهێشت، تاوەکو ئێستاش ئەو قەزایە بەدەست نەبوونی خزمەتگوزاری و خراپی دۆخی ئەمنی و ئیدارییەوە دەناڵێنێت.