ئاگادارییەک لە 'هەژماری من'ـەوە بۆ خانەنشینان

ئاڤا نیوز

 

وەزارەتی دارایی و ئابووری ئاگاداری ئەو خانەنشینانە دەکاتەوە کە فۆڕمی خۆ تۆمارکردن لە پڕۆژەی "هەژماری من"ـیان بردووە و هێشتا نەیانگەڕاندوەتەوە، داوا دەکرێت بە زووترین کات فۆڕمەکە بگەڕێننەوە.

 

وێنە گەورەکە: هەژماری من، پڕۆژەی بە بانکیکردنی مووچەی فەرمانبەرانە، لەلایەن سەرۆکوەزیران مەسرور بارزانی، لە 7ـی ئاداری 2023 ڕاگەیێنرا. بەپێی دواین ئاماری تیمی هەژماری من، مانگی ڕابردوو 219 هەزار مووچەخۆر لە ڕێگەی ATMـەوە مووچەیان وەرگرتووە.

 

ڕاگەیێنراوی فەرمی: وەزارەتی دارایی و ئابووری حکومەتی هەرێمی کوردستان ڕایگەیاند، داوا لە هەموو ئەو خانەنشینانە دەکەین فۆڕمی خۆ تۆمارکردنیان لە "هەژماری من" لایە و نەیانگەڕاندوەتەوە، بە زووترین کات بیگەڕێننەوە بنکەی هەژماری من لەناو ئەو بانکەی فۆڕمەکەیان لێ وەرگرتووە، بۆئەوەی بتوانن بە ئاسانی مووچەکەیان لەڕێگەی هەژماری بانکی تایبەت بەخۆیان وەربگرن.

 

وەزارەتی دارایی و ئابووری ئەوەشی ڕاگەیاندووە: تا ئێستا زیاتر لە 290 هەزار فەرمانبەری خانەنشین فۆڕمی پڕۆژەی "هەژماری من"ـیان وەرگرتووە.

 

ئەوەی پێویستە بیزانیت: لە ڕاگەیێنراوەکەی وەزارەتی دارایی هاتووە، خانەنشینان دەتوانن پەیوەندی بە سەنتەری خزمەتگوزاری پڕۆژەی هەژماری من بکەن بە ژمارە 1991. سەنتەرەکە لە کاتژمێر 8:00 بەیانی تاوەکو 9:00 شەو بەردەستە.