پارتی: بەربژێرمان بۆ پۆستی پارێزگاری کەرکووک دەبێت

ئاڤا نیوز

ئەندامێکی مەکتەب سیاسی پارتی دیموکراتی کوردستان ئاماژە بەوەدەدات، پێداگری لەسەر ئەوە دەکەن پۆستی پارێزگاری کەرکووک بۆ کورد بێت، دەشڵێت "بەربژێرمان بۆ پۆستی پارێزگاری کەرکووک دەبێت".

ئەوەی پێویستە بیزانیت: بڕیارە سبەی 03-03-2024، کۆبوونەوەی دووەمی لایەنە براوەکانی ئەنجوومەنی پارێزگای کەرکووک لەگەڵ محەممەد شیاع سوودانی، سەرۆکوەزیرانی عێراق بکرێت، پارتیش وەک لایەنێکی ئەو پارێزگایە بەرنامەی تایبەت بەخۆی هەیە.

لێدوانی فەرمی: هیوا ئەحمەد، ئەندامی مەکتەبی سیاسی و بەرپرسی مەکتەبی ڕێکخستنی کەرکووک  -گەرمیانی پارتی دیموکراتی کوردستان بۆ ئاڤا نیوز گوتی: پێمان باشە کوردێک ببێت بە پارێزگار  بۆ بەرزکردنەوەی ورەی هاونیشتمانیانی کورد لە کەرکووک و بۆ ئەو پۆستە بەربژێرمان دەبێت.

ئەمەش بزانە: جگە لە پارتی، یەکێتیی هەریەک لە (ڕێبوار تەها، نەشئەت شاهوێز و یوسف گۆران)ـی بۆ ئەو پۆستە بەربژێر کردووە، لایەنە عەرەبییەکان موهەیمەن حەمدانی و خالید مەفرەجی، تورکمانەکانیش محەممەد سەمعانیان بۆ پۆستی پارێزگاری کەرکووک بەربژێر کردووە.

بۆچی گرنگە: زیاتر لە دوو مانگە هەڵبژاردنی ئەنجوومەنی پارێزگاکانی عێراق کراوە، بەڵام تائێستا پۆستی پارێزگاری کەرکووک یەکلایی نەکراوەتەوە، بەربژێری هەر لایەنێک دەنگی پێویست بەدەست بهێنێت دەبێتە پارێزگاری کەرکووک.